Vanitè dès vanitès
Cwèfè al briyantine,
R'nipè come in man'quin d' vitrine,
Pèpère Martin,
Racassèrè dins s' nouvia sint-frusquin,
Print dès-érs dins s' djârdin.
I bôye ô lon èy' i pèstèle
Su 'ne bèle couche as-èspènes
Qui s'èrvindje èt trâwe èl pia
D' sès nwérs solés qu'astît si bias !
I crîye, djure, sôtèle,
S'èrtoûrne sins wétî,
Tchét lès quate fiêrs ô r'vièrs
Dins l' gras du feumî !
Sacristè, qué tablô,
Pou lès vijins muchis
Padrî leûs ridôs !
Pèpère Martin a bin dè l' pwène.
Sul côp d'ène eûre,
I d'veut daler
Din.ner,danser èt fréquenter
Ô mâriâdje da Filomène,
Èl fîye Félicyin
Qu'èst fârmacyin à Mârciène.
An tout pinsant ô pléji dèl fièsse,
I brét sès-îs wôrs dè s' tièsse.
Mins, dijèz m', a-t-on idéye,
Quand on-èst si fin kimpè
D' daler s' palanter intrè sès pârtchès ?
(Croque-Codâk !
Codâk, èl coq dal cinse Lèyon
Èst fiêr... fiêr come in pawon.
I s'èrcrèsse èt fé toufêr' ès' crèsse
An tout r'wétant lès-ôtes di crèsse.
C'èst vré qu'il èst bia
Èt, ma fwè, fôrt d'alène.
Pour li, l' poulî, c'èst s'n-Olympia !
I s' print pou l' ténor dèl pouy'trîye
Èt cocoricote à l'invîye
Ayeûrant lès djoûs dèl samwène.
I n' pout sinti l' pètit roucha,
Èl chèri colô da Juliya.
Toutes lès pouyètes d'ont après li.
Èles fèrtiy'neut èyèt s' pan.m'neut
À l'idéye d' plére à sès bias-îs.
L' Inglès, come on l' lome,
Fréquente sins rat'na.
Codâk rutîye dins sès plomes.
L'invîye èl chôpîye di trawer l' pia
Du coquia qui l' mèt al potince.
I ratint s' momint,
Rûje ès' pacyince.
In djoû, c'èst seûr èt cèrtin,
I s'pèk'ra sul gâte mwin.nâdje.
Côps di spourons, côps d' bètch,
Bacanâl, maksôdâdje...
Lès deûs s'èrtrouv'ront tout mètch!
Pèle-mi, pèle-mèle, dins l' pélon èmayè,
Is cach'ront après leûs boukèts.
Quand l' cinsière a du caractêre,
Pavarotti d' poulî èt colô cache-misêre
Ça toûrne co bin à coqs ô vin !
(