1 Les djins avént cmincî a peupler li stindêye del daegn, et il avént cmincî a mete å monde des båsheles.
2 Les fis då bon Diè veyît k' les båsheles des omes estént beles, ça fwait k' i ndè tchoezixhît po les marier.
3 Adon, li Signeur derit: «Mi esprit n' moennrè nén l' ome po tofer, ca i n' est fwait ki d' tchår: i n' pôrè viker ki cint et vint ans.»
4 Di ç' tins la, les djeyants viként sol tere, et il î estént co cwand les fis då bon Diè vnît prinde feume amon les omes et k' il avît des efants avou. C' est zels, les fameus héros do vî tins.
5 Mins l' Signeur veya k' les djins n' avént pus rén d' bon e leu capotene: tote li djoûrnêye, leu cour ni saveut pus tuzer k' a må.
6 Do côp, li Signeur si rpintixha d' aveur fwait l' ome et l' feume sol tere; il end esteut tot disloujhî.
7 «Les djins k' dj' a fwait, djelzès disfaçrè foû del daegn», dijha-t i, «et avou zels, les grosses et les ptitès biesses et minme les oujheas do cir, ca dji so-st å rpintant delz aveur fwait.»
8 Noyé, portant, li Signeur el veyeut voltî.
9 Et voci l' istwere da Noyé. Li Noyé, c' esteut on binamé, èn ome ki rotéve droet inte les djins di s' tins. I shuveut l' voye do Signeur.
10 Il aveut troes valets: Sem, Xham et Djafet.
11 Li tere poûrixheut ås ouys då bon Diè: ci n' esteut pus k' såvadjreye tot avå.
12 Li bon Diè rwaita l' tere et i veya k' ele poûrixheut: tos les djins, pa tt avå l' daegn, avént toûrné a våréns.
13 Adon, li bon Diè derit a Noyé: «Por mi, li fåve est foû po tos les djins! Ci n' est pus k' såvadjreye tot costé! Djelzès va distrure avou l' tere.»
14 «Fabrikez v' on batea avou do bwès d' sapén. Vos î måjhnêyroz tos plin des tchambes. Adon, i vos l' fårè covri avou do daguet, å dvins come å dfoû.
15 Li batea serè cint céncante metes long, vint cénk metes lådje et cwénze metes hôt.
16 On dmêy mete å dzeu do batea, vos froz on toet avou on pegnon. Vos metroz l' intrêye do batea sol costé. Å dvins, gn årè on prumî, on deuzinme et on troezinme livea.
17 Tant k' a mi, dji m' va fé vni les grossès aiwes, dji m' va fé tchair les aiwes sol daegn po distrure tot çou ki vike dizo l' cir; tot çou k' i gn a sol daegn påyrè di s' veye.
18 Mins avou vos, dji frè 'ne aloyance: moussîz e batea, vos minme et vos efants, vosse feume et les feumes da vos efants.
19 Di tot çou ki vike, di totes les biesses, vos froz moussî ene cope dins l' batea, por zeles sorviker avou vos: on måle et ene frumele!
20 Di tchaeke sôre d' oujheas, di tchaeke sôre di grosse et di ptitès biesses ki vikèt sol daegn, ene cope vénrè avou vos, por ley sorviker.
21 Et vos, purdoz totes sôres di sacwès a magnî et s' metoz vos amonucions a pont, por vos et les ôtes saveur magnî.»
22 Noyé schoûta: i fjha tot çou ki l' bon Diè lî aveut dit.