[] [] []
suivant: 42 monter: Å Cmince précédent: 40

41

1 Deus ans pus tård, li Farawon out on sondje. Il esteut å boird des aiwes do Nil

2 et i loukîve set belès cråssès vatches ki montént foû des aiwes et s' mete a paxhe avå les bouxhons.

3 Adon, set minåbès mwinrès vatches montît foû des aiwes do Nil eto. Ele si metît asto des prumires, so ls erives.

4 Et vola k' les laidès mwinrès vatches mougnént les set belès cråssès vatches. Adon, li Farawon si dispierta.

5 Ci pwis la, i s' redoirma et-z aveur on deuzinme sondje: i gn aveut set belès grossès påtes ki montént foû del minme bodje.

6 Pu, setès ôtès påtes, tote grêyes et broûlêyes do vint do levant, crexhît après zeles.

7 Et les grêyès påtes mougnît les set påtes k' estént grosses et rinflêyes. Do côp, li Farawon s' dispierta. I n' aveut fwait ki do sondjî!

8 L' å-matén, tot vî, Farawon fjha vni tos les macrês et totes les sûteyès djins k' i gn aveut e l' Edjipe. I lzî conta l' sondje k' il aveut fwait. Mins nén onk di zels ni parvina a diskimeler l' vôtion.

9 Adon, li maisse do vén atôcha Farawon: «I fåt ki dji cfesse mes fåtes, asteure!», di-st i.

10 «Farawon esteut mwais après ses sierviteus. Mi eyet l' maisse do pwin, nos esténs el gayole amon li cmandant des wåres.

11 Nos avans ambedeus avu on sondje, li minme nute. Mins nos deus sondjes ni volént nén dire li minme afwaire.

12 I gn aveut avou nos ôtes on djonne Êbreu, on sclåve do cmandant des wåres. Nos lî avans conté nos sondjes et c' est lu ki nos a mostré çou k' i faleut comprinde; i ns a dit a tos les deus çou k' nos sondjes volént dire.

13 Et tot a fwait s' a passé tot djusse come il aveut dit: dj' a rpris m' plaece, adon ki l' ôte esteut pindou.»

14 Do côp, li Farawon houca l' Djôzef, k' on-z amina al vole foû do prijhon. Après avu fwait s' båbe et candjî ses mousmints, i s' prezinta dvant li Farawon.

15 «Dj' a fwait on sondje,» k' i derit l' Farawon a Djôzef, «et gn a nouk kel sait diskimeler. Mins dj' a oyou dire ki twè, ti n' as k' a etinde on sondje pol saveur disvôtyî.»

16 Djôzef responda: «Ci n' est nén mi, c' est l' bon Diè ki sårè dner l' response ki schaprè li Farawon.»

17 Et Farawon conta ses sondjes å Djôzef: «E m' sondje,» di-st i, «dj' aveu l' idêye ki dj' esteu å boird des aiwes di Nil.

18 Tot d' on côp, i gn a set belès cråssès vatches ki vnèt paxhî dins les bouxhons.

19 Mins vola k' i gn a setès ôtès vatches ki montèt drî zeles. Ele sont setches, foirt laides a vey, tote mwinres. Dj' end a måy veyou des si laides avå tot l' payis d' Edjipe.

20 Les vatches k' estént mwinres et laides magnît les set prumires, les cenes k' estént cråsses.

21 Mins ene feye k' elle avît tot mindjî, on n' åreut nén dit, ca elle estént todi ossi laides. La dsu, dji m' a dispierté.

22 Adon, dj' a-st aporçû dins on sondje set påtes ki crexhént sol minme bodje; elle estént beles et rinflêyes.

23 Mins vola k' tot d' on côp, i gn aveut eto set grêyès setchès påtes, rissouwêyes på vint do levant, ki crexhént après zeles.

24 Et les grêyès påtes magnît les setès belès påtes. Dj' a splikî tot a fait a les macrês, mins nén onk n' i m' a dné 'ne response.»

25 «Li Farawon n' a fwait k' on seul sondje.» di-st i l' Djôzef. «Li bon Diè a-st anoncî å Farawon çou k' i va acompli.

26 Les setès belès vatches riprezintèt setès anêyes. Et les setès påtes riprezintèt setès anêyes eto: ci n' est k' on sondje, todi l' minme.

27 Adon, les set laidès mwinrès vatches ki montèt riprezintèt setès anêyes, tot come les setès grêyès påtes, broûlêyes på vint do levant: c' est k' i gn årè setès anêyes di påmagne.

28 Vola çou k' dj' a dit å Farawon: li bon Diè a mostré å Farawon çou k' il aléve fé.

29 Nos alans aveur setès anêyes k' i gn årè di d' tot a make tot avå l' Edjipe.

30 Adon, i gn årè setès anêyes di påmagne. On roveyrè çou k' c' esteut di l' abondance e l' Edjipe. Tot l' payis serè remolou d' famene.

31 On roveyrè çou k' c' esteut di l' abondance e payis, cwand cisse famene la serè sor lu: ca ele serè deure ki po-z aredjî.

32 Eyet si l' Farawon a sondjî çoula deus feyes, c' est ki l' bon Diè est bén decidé, et k' il a håsse di fé insi.

33 Asteure, li Farawon n' a pus k' a trover èn ome ki seye malén et sûti, et l' rinde maisse do payis d' Edjipe.

34 Farawon s' doet mete a l' ovraedje et lomer des fonccionaires dins tot l' payis. Dins les setès anêyes d' abondance, i doet luver des tayes sol cénkinme pårtêye.

35 Les fonccionaires duvront ramonçler tot l' amagnî des plintiveusès anêyes ki s' anoncèt, et rahopler l' frumint dins les mwins da Farawon. I fårè mete di l' amagnî dins les veyes et les viyaedjes, et l' wårder.

36 Cist amagnî la doet esse wårdé pol payis d' Edjipe, po les setès anêyes di famene ki vont shure. Insi, li payis ni môrrè nén del famene.»

37 Li façon d' cåzer da Djôzef plaijheut bén a Farawon et a tos ses maisses sôdårs.

38 «Est çki nos trovrans bén èn ôte come lu?», dimande-t i li Farawon a ses maisses sôdårs, «èn ome ki l' esprit då bon Diè est dvins lu?»

39 Adon, Farawon atôche li Djôzef: «Après ki l' bon Diè vs a fé cnoxhe tot çoula, i gn a pus nouk di pus malén et di pus sûti k' vos.

40 C' est vos ki serè maisse do palås, et totes mes djins front come vos cmandroz; c' est bon k' dji so rwè po-z esse so on pûs hôt pîd k' vos.

41 Dji vs met al tiesse», di-st i l' Farawon a Djôzef, «di tot l' payis d' Edjipe.»

42 Adon, Farawon oista èn anea k' il aveut a s' mwin pol passer å doet da Djôzef. I lî fjha mete des hårdes di fén lén et on colier d' ôr åtoû di s' cô.

43 I l' fijha griper sol pus bea tchår k' il aveut après l' sinne. On breyeut pa dvant lu «A djnos!» Vola cmint çk' i fout metou al tiesse di tot l' payis d' Edjipe.

44 «Dji so Farawon», di-st i Farawon a Djôzef. «Mins dins tot l' payis d' Edjipe, gn a pus nolu ki luvrè on pîd ou ene mwin sins vosse permission.»

45 Adon, Farawon decida ki l' Djôzef sereut lomé Sofnat-Paneyah et i lî dna Asnat pol marier, li feye da Poti-Fera, priyesse d' On. Et l' Djôzef end ala avå l' payis d' Edjipe.

46 Li Djôzef aveut trinte ans cwand i s' prezinta dvant Farawon, rwè d' Edjipe. Ça fwait k' vola l' Djôzef evoye po voyaedjî tot costé e payis d' Edjipe.

47 Ossu lontins ki les setès anêyes d' abondance durît, li tere dina a make.

48 I ramonçla l' amagnî tot l' tins des setès anêyes d' abondance e payis d' Edjipe, pol mete dins les veyes. Dins tchaeke veye, i fjheut rahopler l' amagnî ki provneut des campagnes tot åtoû.

49 Li Djôzef rahopla ostant d' frumint k' i gn a do såvlon el mer; i gn aveut télmint k' on nel carculéve pus, ca çoula passéve tote mezeure.

50 Divant ki l' anêye del famene advinaxhe, li Djôzef ava deus valets d' Asnat, li feye da Poti-Fera, priyesse d' On.

51 Li pus vî, Djôzef lî dna come no Manassé «ca, di-st i, li bon Diè m' a fwait rovyî tote mi poenne eyet tote li famile da m' pa».

52 Li deuzinme, on l' loma Efrayim «ca, di-st i, li bon Diè m' a fwait poirter des fruts sol tere di m' måleur».

53 Adon, les setès anêyes d' abondance estît foû pol payis d' Edjipe.

54 Et les setès anêyes di famene kimincît, come Djôzef aveut dit. Ca bén ki l' famene esteut so tot l' payis, i gn aveut co do pwin a magnî tot costé e l' Edjipe.

55 Adon, cwand tot l' payis cminca a-z aveur fwin; li peupe breyeut po dmander do pwin a Farawon. «Aloz dlé l' Djôzef», derit i Farawon a tos les Djupsyins, «et s' fijhoz come i vos dîrè!»

56 Li famene esteut tot costé sol tere. Ça fwait k' Djôzef drova totes les gregnes plinnes di frumint et vinde des grins åzès Djupsyins.

57 Di tot costé, on vneut e l' Edjipe po-z atchter do grin a Djôzef, ca l' famene esteut todi pus fele tot avå l' daegn.


[] [] []
suivant: 42 monter: Å Cmince précédent: 40
Lorint Hendschel 2003-07-03