1 Saray, li feume da Abram, ni lî aveut co pont dné d' efant. Elle aveut ene meskene, ene Djupsyinne, ene lomêye Hagår.
2 Et l' Saray derit a Abram: «Li Signeur n' a nén volou k' dj' åye èn efant. Alez avou m' meskene; motoit k' par ley, dj' årè on valet.» Abram fijha come si feume aveut dit.
3 Ça fwait ki l' Saray purda Hagår, si meskene djuspyinne, pol diner come feume a Abram, si ome. A ç' moumint la, i gn aveut dijh ans k' Abram dimoréve e payis d' Canaan.
4 L' Abram coûtcha avou Hagår et cisse chal ratinda famile. Do côp k' ele s' aviza k' ele ratindeut, ele n' aconta pus s' maitresse.
5 Adon, li Saray derit a Abram: «C' est vos les cåzes s' on m' dimeprijhe. C' est mi k' a bouté m' meskene dins vos brès et d' abôrd k' elle a ratindou famile, dj' a conté po rén a ses ouys. Ki l' Signeur djudje etur vos et mi.»
6 L' Abram responda a Saray: «E bén, vosse meskene, c' est da vos. Fijhoz a vosse môde avou ley.» Saray l' a si bén bouriaté ki l' ôte a peté å diâle lon erî d' ley.
7 L' andje då Signeur el trova dlé on soûrdant, e dézert, sol voye di Chour.
8 I l' atôcha: «Hagår», di-st i, «meskene da Saray, d' eyu çki vos vnoz et wice end alez v' insi?» «Dji cour evoye lon erî d' Saray, mi maitresse!» di-st ele.
9 L' andje då Signeur lî derit: «Alez rz è amon vosse maitresse et s' schoûtez tot çou k' ele vos dit.»
10 L' andje då Signeur lî derit co: «Dji frè k' vos åroz télmint des efants k' on n' les sårè conter».
11 L' andje då Signeur lî derit ossu: «Asteure, vos ratindoz famile et vos åroz on valet k' on l' lomrè Ismayel, ca l' Signeur a bén sintou k' vos estîz disloujheye.
12 I serè come on såvadje ågne, min ome! Si mwin conte tot l' monde, les mwins da tot l' monde conte lu! I dmeurrè a l' adroet d' tos ses frés.»
13 Hagår loma l' Signeur ki lî aveut djåzé Atta El Roy2 ca ele s' aveut dit: «Est ç' di bon k' dj' a veyou chal li bon Diè ki m' voet?»
14 C' est ça ki l' puss vaila fout lomé Laxhay Roy.3 I s' trove inte Cadech et Bered.
15 Hagår out on valet d' Abram; on l' loma Ismayel, li valet k' Hagår lî aveut dné.
16 L' Abram esteut cwatrè vint shijh ans vî cwand Hagår lî dna Ismayel.