1 Après totes ces furdinnes la, vola k' Abram ôt l' bon Diè ki lî dvize dins 'ne vuzion. «N' åyoz nén sogne, Abram», di-st i, «c' est mi, vosse mambor, li ci ki v' met a hute. Vos åroz 'ne rescompinse nuzome!»
2 Mins l' Abram respond: «Signeur, cwè çki vos m' pôrîz dner? Dj' eva sins nol efant. C' est l' Eliezer di Damas k' årè tos mes béns.
3 Vos n' m'avoz pont dné d' efant», di-st i Abram, «et c' e-st on vårlet di m' måjhon ki dvreut esse mi eritî.»
4 Adon, l' bon Diè lî cåze insi: «Ci n' est nén lu k' eritrè d' vos, mins l' ci ki mousrè foû d' vosse schoû.»
5 I l' amine a l' ouxh: «Loukîz l' cir», di-st i, «et s' contez les stoeles, si vs sårîz.» Adon: «Vos efants, gn årè ostant k' çoula», di-st i.
6 Abram out fiyate å Signeur, et c' est ça ki l' Signeur el riwaita come on djusse.
7 I lî derit co: «C' est mi, l' Signeur, ki vs a fwait moussî foû d' Our, e payis des Caldeyins, po v' diner ç' payis ci, por lu esse da vosse.»
8 «Signeur bon Diè», responda-t i, «kimint çki dj' sårè ki ci serè da minne?»
9 I lî derit: «Purdoz 'ne åmaye di troes ans por mi, ene gade di troes ans, on bara d' troes ans, ene tûtrale et on djonne di colon.»
10 Abram lî trova totes ces biesses la; i les côpa e deus å mitan, et mete les bokets a l' adroet d' onk l' ôte. Mins i n' côpa nén les oujheas.
11 Les moxhets aplovît so les cadåves, mins Abram les tchessîve evoye.
12 A l' anuti, Abram sinta ki s' edoirmeut. I fout ewaeré di s' ritrover e li spexheu.
13 Li Signeur derit a Abram: «Vos dvoz saveur ki vos efants dmeurront dins on payis ki n' serè nén da zels. I seront des sclåves, eyet spotchîs cwate cints ans å long.
14 Mins dji punixhrè l' nåcion ki les frè sclåves. Adon, il è rexhront tcherdjîs d' tot plin des ritchesses.
15 Tant k' a vos, c' est tot påjhirmint k' vos îroz rtrover vos tåyes: vos seroz essevli après aveur sitî binåjhe tins d' vosse viyesse.
16 C' e-st al cwatrinme coûsse ki vos efants rvénront avår ci ca, pol djoû d' oûy, les toirts des Amorites ni sont nén co å pus foirt.»
17 Li solea s' coûtcha et, tot d' on côp, dins li spexheu, on vôtion d' foumire eyet 'ne toitche di feu passît inte les biesses côpêyes a deus.
18 Ci djoû la, l' bon Diè fjha ene aloyance avou l' Abram: «C' e-st a vos efants k' dji dene ci payis ci, des aiwes di l' Edjipe djusk' åzès grandès aiwes d' Eufrate:
19 li payis des Kenites, des Kenizites, des Cadmonites,
20 des Hitites, des Périzites, des Refayites,
21 des Amorites, des Cananeyins, des Guirgachites eyet des Djezubites.»