[] [] []
suivant: 15 monter: Å Cmince précédent: 13

14

1 Mins vola k' e tins d' Amrafel, rwè d' Chineyår, Arioc, rwè d' Ellasår, Kédorlawomer, rwè d' Élam eyet Tideyål, rwè d' Goyim

2 ces cwate rwès la fjhît l' guere a Bera, rwè d' Sodome, a Birxha rwè d' Gomôre, a Chineyav, rwè d' Adma, a Cheméver, rwè d' Cevoyim et a Sowår, rwè d' Bela.

3 Ces ci si dvént rapoûler do costé do vå d' Sidim, li mer di Sé.

4 Doze ans å long, il avént siervou Kédorlawomer; li trazinme, i s' avént rbelé.

5 Ça fwait ki l' catwarzinme anêye, Kédorlawomer aboule avou les rwès ki l' aconcwestént. I batèt les Refayites a Ashtarot-Carnayim, les Zouzites a Ham, les Emites a Chawé-Kiriatayim,

6 les Horites so leu tier e payis d' Saiyir, k' i porshuvèt djusk' å tchinne di Paran, asto do dézert.

7 Adon, i rivnèt so Eyn-Michpat, ou Kadech, et ravadjî totes les campagnes des Amalécites, et vinki les Amorites, ki dmorént a Hassassôn-Tamar.

8 Adon, li rwè d' Sodome si met èn alaedje avou les rwès d' Gomôre, d' Adma, di Cevoyim et d' Bela (ou Sowår); i s' apontièt po s' bate conte zels e vå d' Sidim,

9 conte Kédorlawomer rwè d' Élam, Tideyål rwè d' Goyim, Amrafel rwè d' Chineyår, Ariok rwè d' Ellassår: cwate rwès conte cénk.

10 È vå d' Sidim, gn a tot plin des puss å bitume; come i petèt å diâle, les rwès d' Sodome et d' Gomôre tcheyèt dins onk, sol tins k' les ôtes riwès el luvèt après les tiers.

11 Les wangnants scrotèt tos les béns d' Sodome et d' Gomôre, et tot çou k' i gn a a mindjî. Adon il ervont.

12 Tot nd alant, i purdèt Lot, li neveu da Abram, et tos ses béns, ca i dmoréve a Sodome.

13 Ene sakî k' aveut parvinou a peter å diâle apoite li novele a Abram l' Êbreu, ki dmoréve dilé les tchinnes da Mambré, l' Amorite, fré d' Exhcol et d' Aner; ces la tnént avou l' Abram.

14 Si rade k' il aprind ki s' fré a stî apicî, abeye, i rashonne troes cints dijh hût vårlets ki sont dins måjhon dispu tot djonne. Adon, i tchesse les rwès djusk' a Dan.

15 Il arindje ses omes po-z ataker les innmis del nute. I les bouxhe djus eyet les porshure djusk' a Hova, å dzeu d' Damas.

16 Adon, i ramoenne totes les ritchesses; i ramoenne si fré Lot eto, avou ses béns, les feumes, les parints.

17 Li rwè d' Sodome vént e vå di Schawé, li vå do rwè, po rescontrer Abram, ki rivneut d' aveur batou Kédorlawomer et les rwès ki tnént avou lu.

18 Melkisédek, rwè d' Salem, apoite li pwin eyet l' vén. C' e-st on priyesse då bon Diè, li Foirt Hôt.

19 Vo l' la ki rbenixh Abram è djhant: «Ki l' Abram seye beni do bon Diè foirt hôt k' a fwait k' cir eyet l' tere!

20 Et k' i seye beni, li bon Diè foirt hôt k' a metou vos innmis inte di vos mwins!» Do côp, l' Abram lî dna l' dijhinme di tot a fwait.

21 Li rwè d' Sodome atôche l' Abram: «Rindoz m' les djins», di-st i, «et s' purdoz por vos les ritchesses!».

22 Mins l' Abram lî respond: «Dji stind m' mwin viè l' Signeur, bon Diè foirt hôt, k' a fwait l' cir eyet l' tere:

23 nén on filé! Nén ddja li scorion d' ene sandåle! Dji djeure di n' rén prinde da vosse. Vos n' pôroz nén dire: ``C' est mi k' a-st aritchi l' Abram''.

24 Rén por mi! A pårt l' amagnî des djonnès djins; pol pårt des omes ki sont-st avou mi, Aner, Exhcol et Mambrê, i s' sievront bén zels minmes.»


[] [] []
suivant: 15 monter: Å Cmince précédent: 13
Lorint Hendschel 2003-07-03