[] [] []
suivant: 14 monter: Å Cmince précédent: 12

13

1 Ça fwait k' l' Abram, ene feye foû di l' Édjipe, monta après l' Néguev, lu, si feume et tot çou k' il aveut da sinne. Et Lot esteut avou lu.

2 Abram esteut foû ritche di bisteu, d' årdjint et d' ôr.

3 Il rôla d' on campmint a l' ôte, do Néguev a Bétel et djusk' al plaece k' il î aveut monté s' toetea po cmincî, inte Bétel et Ay.

4 Al plaece k' il aveut bati èn åté, i gn aveut on boket, i breya l' no do Signeur.

5 Tant k' a Lot, k' esteut avou Abram, il aveut lu eto des ptites et des grossès biesses, et co des toeteas.

6 Li payis n' esteut nén crås assez po dner tot çou k' il avént mezåjhe zels deus eshonne, ca il avént ambedeus on trop gros tcheté po saveur viker eshonne.

7 Et vola k' i gn out minme margaye inte les bierdjîs da Abram et les cis da Lot. Adon, les Cananeyins et les Périzites dimorént dins l' payis.

8 Ça fwait k' Abram arinna l' Lot: «I n' fåreut nén k' i gn åreut del bisbrouye inte mi et vos», di-st i, «inte mes bierdjîs et les vosses; nos estans des frés.

9 Wai: n' avoz nén tot l' payis dvant vos? Boutez å lådje erî d' mi. Si vs alez après bijhe, dj' end îrè après solea; si vos purdoz après solea, dj' end îrè après bijhe.»

10 Lot riwaita dvant lu: gn aveut tot l' payis do Djordin, raiwé tot etir. Divant ki l' Signeur ni distrujhaxhe Sodome et Gomôre, c' esteut, djusk' a Sowår, come li djårdén do Signeur, come li payis d' Édjipe.

11 Lot tchwezixha por lu tote li stårêye do Djordin et il end ala après l' luvant. C' e-st insi k' i boutît å lådje erî d' n-on l' ôte:

12 l' Abram dimora e payis d' Canaan, sol tins ki l' Lot end aléve dins les veyes del sitårêye et camper dlé l' veye di Gomôre.

13 Les djins did la, c' esteut tos bandiyes, ki pétchént k' aredje conte li Signeur.

14 Ene feye Lot evoye, li Signeur arinna Abram: «Luvez vos ouys», derit i, «et del plaece la k' vos estoz, riwaitîz do costé d' bijhe, do solea, do levant et do coûtchant.

15 Oyi, ça: tot l' payis k' vos veyoz, dji vs el dene, a vos, et a vos efants, djusk' a todi.

16 Dji frè k' vos efants seyexhe come li poûssire del daegn, tantia k' s' on såreut conter l' poûssire del daegn, on contreut bén vos efants eto.

17 Abeye! Rotez tot avå l' payis, lådje et lon, ca dji vs el dene».

18 Abram, avou ses toeteas, vinve po dmorer dlé les tchinnes di Mambrê, a Hébron; vaila, i batixha èn åté pol Signeur.


[] [] []
suivant: 14 monter: Å Cmince précédent: 12
Lorint Hendschel 2003-07-03