Çouchal e-st on ratournaedje e walon del Djeneze, prumî live del Bibe.
I v' fåt saveur çou ki shût.
Li ratourneu n' î cnoxhe ni a ni b dvins l' teyolodjeye, ca bén k' dj' a lejhou sacwants afwaires po m' aidî a comprinde.
Li ratournaedje n' a nén stî fwait a pårti des prumîs sourdants mins a pårti d' ôtes ratournaedjes, çou ki fwait ki l' risse di biestreye est doblé.
Dj' a tot l' minme waitî d' ovrer a môde di djin.
Li ratournaedje ki dji m' end a siervou li d' pus, li prumî et ki dj' a tofer ritoumé dsu po tot çou ki rwaite li sins, c' est l' ci da Chouraqui, k' est fwait å pus près del prumîtrinne modêye.
On côp m' tecse sondjî a pårti di Chouraqui, dj' aveu cwè? On payizaedje di pire, di vint, di såvlon. Ça a ene sacwè d' emacralant, 'l est seur, mins nos ôtes les Europeyins, nos n' estans nén acostumés et tot ça fwait on pô aveur pawe.
I faleut rniper on pô l' messaedje. Po ça, dji m' a aidî di totes sôrtes di ratournaedjes (vîs, modienes, catolikes, protestants, eucumenikes...) dins totes sôrtes di lingaedjes ki dji cnoxhe (ene miete ou co bén): latén (vulgate), francès (apreume li Bibe di Maredsous, on-z est Walon ou on n' l' est nén), inglès, espagnol, neyerlandès.
Notez ki dji m' a sovint siervou eto d' on ratournaedje e creyole: vos n' croerîz nén come li creyole eyet l' walon si ravizèt, come i sont ambedeus des djonnes lingaedjes (çou k' dji vou dire avou ça, dji vs el laiye adviner).
On foirt bon site internet avou tot plin des ratournaedjes et ki dji m' end a bråmint siervou:
Asteure ki vos savoz k' i vs fåt dmefyî di m' sicrijhaedje, pol ratournaedje come pol teyolodjeye, léjhoz si v' oizoz.