La croisade de Constantinople

   Endementiers que l'empereres Alexis fu en cele ost, si ravint une grant mesaventure en Constantinople: que une meslée comença de Grieus et de Latins qui erent en Constantinople estagier; dont il en i avoit mult. Et ne sai quels genz, por mal, mistrent le feu en la ville; et cil feus fu si granz et si orribles que nus hom nel pot esteindre ne abaissier. Et quant ce virent li baron de l'ost, qui estoient herbergié d'autre part del port, si furent mult dolent et mult en orent grant pitié, com il virent ces hautes eglises et ces palais riches fondre et abaissier, et ces granz rues marcheandes ardoir à feu que il n'en povoient plus faire. Einsi porprist li feus desus le port à travers, très ci que parmi le plus espès de la ville et trosque en la mer d'autre part, rez à rez del mostier Sainte-Sophie. Et dura deus jorz et deus nuis, que onques ne pot estre estainz par home; et tenoit bien li frons del feu, si com il aloit ardant, demie lieu de terre. Del damage, ne de l'avoir, ne de la richesce qui là fu perdue, ne vos porroit nus conter, et des homes et des fames et des enfanz, dont il ot mult ars.
   Tuit li Latin qui estoient hebergié dedenz Constantinople, de quelque terre que il fussent, n'i osèrent plus demorer, ainz pristrent lor fames et lor enfanz, et lor avoirs que il en porent traire del feu ne eschaper; et entrèrent en barges et en vaissiaus, et passèrent le port devers les pelerins. Et ne furent mie peu, que il furent bien quinze mil, que petit que grant; et puis fu il granz mestiers as pelerins que il fussent outre passé. Einsi furent desacointié li France et li Grec; que il ne furent mie si comunel com il avoient esté devant; si ne s'en surent à qui prendre, qu'il lor pesa d'une part et d'autre.
   En cel termine, avint une chose dont li baron et cil de l'ost furent mult irié: que li abbés de Los, qui ere sainz hom et prodom, fu morz, et qui avoit volu le bien de l'ost; et ere moines de l'ordre de Cistiaus.