Li peuples à
ce prince crestien estoit si grans, que li messagier
le roy nous contèrent que il avoient en leur
ost huit cens chapelles sus chars. La manière de leur vivre estoit tele, car il ne mangeoient point de pain, et vivoient de chair et de lait. La mieudre chairs que il aient, c'est de cheval, et la mettent gesir en
souciz et séchier après, tant que il la tranchent aussi comme pain noir. Li mieudres bevraiges que il aient et li plus forz, c'est de lait de jument confit en herbes. L'on présenta au
grant roy des Tartarins un cheval chargié de farine, qui estoit venus de trois mois d'aleure loing; et il la donna aus messagiers
le roy.
Il ont mout de peuples crestiens qui croient en la loy des
Grieus, et cil dont nous avons parlé et d'autres. Ceus envoient sur les Sarrazins quant il veulent guerroier à eus; et les Sarrazins envoient sus les crestiens quant il ont afaire à eus. Toutes manières de femmes qui n'ont enfans vont en la bataille avec eus; aussi bien donnent-il
soudées aus femmes comme aus homes, selonc ce que elles sont plus viguereuses. Et contèrent li messagier
le roy que li soudoier et les soudoières manjuent ensemble es hostels des riches homes à cui il estoient; et n'osoient li home touchier aus femmes en nulle manière, pour la loy que
leur premiers roys leur avoit donnée. Toutes manières de chairs qui meurent en leur
ost, il manjuent toutes. Les femmes qui ont leurs enfans les conroient, les gardent, et atournent la
viande à ceus qui vont en la bataille. Les chairs crues il mettent entre leur selles et leur paniaus; quant li sans en est bien hors, si la manjuent toute crue. Ce que il ne peuvent mangier jetent en un sac de cuir; et quant il ont fain, si oevrent le sac, et manjuent touz jours la plus vieille devant. Dont je vi un Coremin qui fu des gens
l'empereur de Perse, qui nous gardoit en la
prison, que quant il ouvroit son sac nous nous bouchions, que nous ne povions durer, pour la punaisie qui
issoit du sac.
Or revenons à nostre matière et disons ainsi, que quant
li grans roys des Tartarins ot receu les
messaiges et les presens, il envoia
querre par asseurement plusieurs roys qui n'estoient pas encore venu à sa
merci; et leur fist tendre la chapelle, et leur dist en tel manière:
«Seigneur,
li roys de France est venus en nostre
merci et subjection, et vez-ci le
treu que il nous envoie; et se vous ne venez en nostre
merci, nous l'envoierons
querre pour vous confondre.» Assés en y ot de ceus qui, pour la peur du
roy de France, se mistrent en la
merci de
celi roy.
Avec les
messaiges
le roy vindrent li leur; et aportèrent lettres de
leur grant roy au
roy de France, qui disoient ainsi:
«Bone chose est de pais; quar en terre de pais mangent cil qui vont à quatre piez, l'erbe paisiblement; cil qui vont à deus, labourent la terre, dont li bien viennent, paisiblement. Et ceste chose
te mandons-nous pour
toy avisier: car
tu ne peus avoir pais se
tu ne l'as à
nous. Car
Prestres Jehans se leva encontre
nous, et tels roys et tels (et mout en nommoient);
et touz les avons mis à l'espée. Si
te mandons que
tu
nous envoies tant de ton or et de ton argent chascun an, que
tu
nous retieignes à amis; et se
tu ne le fais,
nous destruirons
toy et ta gent aussi comme
nous avons fait ceus que
nous avons devant nommez.» Et sachiez que
li rois se repenti fort quant il i envoia.