Je vous avoie oublié à dire la response que
li roys fist au
soudanc de Damas, qui fu tele: que il n'avoit conseil d'aler à li, jusques à tant que il seust se li amiral de Egypte li
adresseroient la trève que il avoient rompue; et il envoieroit à eus, et se il ne vouloient
adrecier la trève, il li aideroit à vengier volentiers de son cousin,
le soudanc de Babiloine, que il li avoient tué.
Tandis que
li roys estoit en
Acre, il envoia
monseigneur Jehan de Valenciennes en Egypte, liquel requist aus amiraus que les outraiges que il avoient faiz au
roy et les dommaiges, que il les rendissent. Et il li distrent que si feroient il mout volentiers, mais que
li roys se
vousist alier à eus contre
le soudanc de Damas.
Mes sires Jehan de Valenciennes les blasma mout des grans outraiges que il avoient faiz au
roy, qui sont devant nommé; et leur loa que bon seroit que, pour le cuer
le roy adebonnairir devers eus, que il li envoiassent touz les chevaliers que il tenoient en
prison. Et il si firent; et d'abondant li envoièrent touz les os
le comte Gautier de Brienne, pour mettre en terre benoite.
Quant
messires Jehans de Valenciennes fu revenus en
Acre atout deus cens chevaliers que il ramena de
prison, sanz l'autre peuple,
ma dame de Soiete, qui estoit cousine
le comte Gautier et sœur
monseigneur Gautier, seigneur de Rinel (cui
fille
Jehans, sires de Joinville, prist puis à femme que il revint d'outre-mer); laquele
dame de Soiete prist les os au
comte Gautier, et les fist ensevelir à
l'Ospital en
Acre. Et fist faire le servise en tele manière, que chascuns chevaliers offri un cierge et un denier d'argent, et
li roys offri un cierge et un besant d'or, tout des deniers
ma dame de Soiete. Dont l'on se merveilla mout quant
li roys fist ce, car l'on ne l'avoit
onques veu offrir que de ses deniers; mais il le fist par sa courtoisie.