Après ces choses,
atirierent li frere au
roy lour
navie, et li autre riche home qui estoient en
Acre. Au partir que il firent d'
Acre,li
cuens de
Poitiers empronta joiaus à ceus qui ralerent en France; et à nous, qui demourames, en donna bien et largement. Mout
me prierent li uns freres et li autres que
je me preisse garde dou
roy; et
me disoient que il n'i demouroit nullui en cui il s'atendissent tant. Quant li
cuens d'
Anjou vit que
requeillir le couvenroit en la nef, il mena tel deuil que tuit s'en merveillierent; et toutevois s'en vint-il en France.
Il ne tarda pas grantment après ce que li frere
le roy furent parti d'
Acre, que li
messaige
l'empereour Ferri vindrent au
roy et li apporterent lettres de créance, et dirent au
roy que
li emperieres les avoit envoiés pour nostre delivrance. Au
roy moustrerent lettres que
li emperieres envoioit au
soudanc, qui mors estoit (ce que
li emperieres ne
cuidoit pas); et li mandoit
li emperieres que il creust ses
messaiges de la delivrance
le roy. Mout de gens distrent que il ne nous fust pas
mestier que li
messaige nous eussent trouvez en la
prison; car l'on
cuidoit que
li emperieres eust envoié ses
messaiges plus pour nous encombrer que pour nous delivrer. Li
messaige nous trouverent delivres; si s'en alerent.
Tandis que
li roys estoit en
Acre, envoia
li soudans de
Damas ses
messaiges au
roy, et se plainst mout à li des amiraus de Egypte, qui avoient
son cousin le soudanc tué; et promist au
roy que se il li vouloit aidier, que il li deliverroit le royaume de
Jerusalem, qui estoit en sa main.
Li roys ot conseil que il feroit response au
soudanc de
Damas par ses
messaiges propres, lesquels il envoya au
soudanc. Avec les
messaiges qui là alèrent, ala
frères Yves li Bretons, de l'ordre des frères Preescheurs, qui savoit le sarrazinois.
Tandis que il aloient de leur hostel à l'ostel du
soudan,
frères Yves vit une femme vieille qui traversoit parmi la rue, et portoit en sa main destre une escuellée pleinne de feu, et en la senestre une phiole pleinne d'yaue.
Frères Yves li demanda:
«Que veus-tu de ce faire?» Elle li respondi qu'elle vouloit du feu ardoir paradis, que j'amais n'en fust point, et de l'eau esteindre enfer, que jamais n'en fust point. Et il li demanda:
«Pourquoy veus-tu ce faire? — Pour ce que je vueil que nulz face jamais bien pour le
guerredon de paradis avoir, ne pour la peur d'enfer; mais proprement pour l'amour de Dieu avoir, qui tant vaut, et qui tout le bien nous puet faire.»