A l'autre dymanche, revenimes tuit devant
le roy; et quant
li roys vit que nous fumes tuit venu, si seigna sa bouche et nous dist ainsi (après ce que il ot appelé l'aide su Saint-Esperit, si comme je l'entent; car
ma dame ma mère
me dist que toute fois que
je voudroie dire aucune chose, que
je appelasse l'aide du Saint-Esperit, et que
je seignasse ma bouche).
La parole
le roy fu tele:
«Seigneur, fist-il,
je vous merci mout à touz ceus qui
m'ont loé m'alée en France, et si rent graces aussi à ceus qui
m'ont loé ma demeurée; mais
je me suis avisiez que se
je demeur
je n'i voy point de peril que mes royaumes se perde; car
ma dame la royne à bien gent pour le deffendre. Et ai
regardé aussi que li baron de cest païs dient, se
je m'en voi, que li royaumes de
Jerusalem est perdus; que nulz n'i osera demeurer après
moy. Si ai
regardé que
à nul fuer
je ne lairoie le royaume de
Jerusalem perdre, lequel
je sui venuz pour garder et pour conquerre; si est mes conseils tel, que
je vueil demeurer. Si di-je à vous, riche home qui ci estes, et à touz autres chevaliers qui voudront demeurer avec
moy, que vous veigniez parler à
moy hardiement; et
je vous donrai tant, que la
coulpe n'iert pas moie, mais vostre, se vous ne voulez demeurer.» Mout en y ot qui oïrent ceste parole, qui furent esbahi; et mout en y ot qui plorèrent.