En ce point que nous estions en
Acre, envoia
li roys
querre se freres et
le comte de Flandres, et les autres riches homes, et leur dist ainsi:
«Signour,
ma dame la royne ma mère m'a mandé et prié, tant comme elle puet, que je m'en
voise en France, car mes royaumes est en grant peril: car je n'ai ne paiz ne treves au
roi d'Angleterre. Cil de ceste terre à cui j'en ai parlé, m'ont dit que se je m'en voi, ceste terre est perdue; car il s'en viendront tuit en
Acre après moy pour ce que nulz n'i osera demourer à si peu de gent. Si vous pri, fist-il,
que vous y pensez; et pour ce que la
besoingne est grosse, je vous donne respit, de moy respondre ce que bon vous semblera, jusques à d'ui en huit jours.»
Dedans ces huit jours vint
li legas à
moy, et
me dist ainsi, que il n'entendoit mie comment
li roys eust povoir de demourer; et
me proia mout
à certes que
je m'en
vousisse revenir en sa nef. Et
je li respondi que
je n'en avoie povoir; car
je n'avoie riens, ainsi comme il le savoit, pour ce que
j'avoie tout perdu en l'yaue, là où
j'avoie esté
pris. Et ceste response ne li fis-
je pas pour ce que
je ne fusse mout volentiers alez avec li, mais que pour une parole que
mes sires de Bollaimmont, mes cousins germains (que Dieus absoille!)
me dist quant
je m'en alai outre mer:
«Vous en alez outre mer, fist-il;
or vous prenés garde au revenir; car nulz chevaliers, ne povres ne riches, ne puet revenir que il ne soit honniz, se il laisse en la main des Sarrazins le peuple menu Nostre Signeur, en laquel compaingnie il est alez.»
Li legas se courouça à
moy; et
me dist que
je ne deusse pas avoir refusé.