Li évesque d'Acre qui lors estoit (qui avoit esté nez de
Provins), me fist prester la maison au curé de
Saint-Michiel.
Je avoie retenu
Caym de Sainte-Manehot, qui mout bien
me servi deus ans, mieus que hom que j'eusse
onques entour
moy au pays; et plusieurs gens avoie retenu avecques
moy. Or estoit ainsi que il avoit une logete, à mon chevet, par où l'on entroit au
moustier.
Or avint ainsi que une contenue
me prist, par quoy
j'alai au lit, et toute ma mesnie aussi. Ne
onques un jour toute jour
je n'oy
onques qui
me peust aidier ne lever; ne
je n'atendoie que la mort, par un signe qui
m'estoit
delez l'oreille: car il n'estoit nus jours que l'on n'aportast bien vingt mors ou plus au
moustier; et de mon lit, toute les foiz que on les aportoit,
je ooie chanter
Libera nos Domine. Lors
je plorai et rendi graces à Dieu, et li dis ainsi:
«Sire, adorez soies-tu de ceste soufraite que tu me fais; car mains bobans ai eus à moy couchier et à moy lever. Et te pri, Sire, que tu m'aides, et me delivres de ceste maladie.» Et aussi fist-il,
moy et ma gent.
Après ces choses
je requis à
Guillemin, mon nouvel escuier, qu'il
me rendist compte; et si fist-il; et trouvai que il
m'avoit bien dommagié de dix livres de tournois et de plus. Et
me dist, quant
je li demandai, que il les
me renderoit quant il pourroit.
Je li donnai congié, et li dis que
je li donnoie ce que il me devoit, car il l'avoit bien
deservi.
Je trouvai par les chevaliers de Bourgoingne, quant il revindrent de
prison (que il l'avoient amené en leur compaignie), que c'estoit li plus courtois
lierres qui
onques fust: car quant il falloit à
aucun chevalier coutel ou courroie, gans ou esperons, ou autre chose, il l'aloit
enbler, et puis si li donnoit.
En ce point que
li roys estoit en
Acre, se prirent li frère
le roy à jouer aux déz; et jouoit li
cuens de
Poitiers si courtoisement, que quant il avoit gaingnié, il fesoit ouvrir la sale et fesoit appeler les gentis homes et les gentis femmes, se nulz en y avoit, et donnoit à poingniées aussi bien les siens deniers comme il fesoit ceus que il avoit gaingniés. Et quant il avoit perdu, il achetoit par
esme les deniers à ceus à cui il avoit joié, et à
son frère le comte d'Anjou et aus autres; et donnoit tout, et le sien et l'autrui.