Or avez oy ci-devant les grans persecucions que
li roys et nous souffrimes; lesquelles persecucions,
la royne n'en eschapa pas, si comme vous orrez ci-après. Car trois jours devant ce que elle acouchast, li vindrent les nouvelles que
li roys estoit pris; desquelles nouvelles elle fu si effreé, que toutes les fois que elle se dormoit en son lit, il li sembloit que toute sa chambre fust pleinne de Sarrazins; et s'escrioit:
«Aidiés, aidiés!» Et pour ce que li enfes ne fust periz dont elle estoit grosse, elle fesoit gesir devant son lit un chevalier ancien de l'aage de quatre-vins ans, qui la tenoit par la main. Toutes les fois que
la royne s'escrioit, il disoit:
«Dame, n'aiés garde; car je suis ci.»
Avant qu'elle fust acouchie, elle fist vuidier hors toute sa chambre, fors que le chevalier, et s'agenoilla devant li et li requist un don; et li chevaliers li otroia par son
sairement. Et elle li dist:
«Je vous demant, fist-elle,
par la foy que vous m'avez
baillie, que se li Sarrazin prennent ceste ville, que vous me copez la teste avant qu'il me preignent.» Et li chevaliers respondi:
«Soiés certeinne que je le ferai volentiers; car je l'avoie jà bien enpensé, que vous occiroie avant qu'il nous eussent pris.»
La royne acoucha d'un fil qui ot à non
Jehan; et l'appeloit l'on
Tristant, pour la grant dolour là où il fu nez. Le jour meismes que elle fu acouchie, li dist l'on que cil de
Pise et de
Genes s'en vouloient fuir, et les autres communes. L'endemain que elle fu acouchie, elle les manda touz devant son lit, si que la chambre fu toute pleinne, et lour dist:
«Signour, pour Dieu
merci, ne lessiés pas
ceste ville; car vous véés que
messires li roys seroit perdus, et tuit cil sont pris, se elle estoit perdue. Et s'i ne vous plait, si vous preigne pitié de ceste
chietive qui ci gist, que vous atendés tant que je soie relevée.»
Et il respondirent:
«Dame, comment ferons-nous ce? Que nous mourons de fain en
ceste ville.» Et elle lour dist que jà par famine ne s'en iroient:
«Car je ferai acheter toutes les
viandes en
ceste ville, et vous retieing touz desorendroit aus despens dou
roy.» Il se conseillierent et revindrent à li, et li otroierent que il demourroient volentiers; et
la royne (que Dieus absoille!) fist acheter toutes les
viandes de
la ville, qui li cousterent trois cens et soixante mille livres et plus. Avant son terme la couvint relever, pour
la cité que il couvenoit rendre aus Sarrazins. En
Acre s'en vint
la royne, pour atendre
le roy.