Je ne veuil pas oublier
aucunes
besoignes qui advindrent en Egypte tandis que nous y estions. Tout premier je vous dirai de
monsigneur Gauchier de Chasteillon, que uns chevaliers, qui avoit nom
Jehan de Monson, me conta que il vit
mon signour de Chasteillon en une rue qui estoit au
kasel là où
li roys fu pris; et passoit celle rue toute droite parmi le
kasel, si que on veoit les champs d'une part et d'autre. En celle rue estoit
messires Gauchiers de Chasteillon, l'espée au poing, toute nue. Quant il veoit que li Turc se metoient parmi celle rue, il leur couroit sus, l'espée au poing, et les flatoit hors du
kasel; et au fuir que li Turc faisoient devant li (il qui traioient aussi bien devant comme darière) le couvrirent tuit de
pilez. Quant il les avoit chaciez hors du
kasel, il se desflichoit de ces
pilés qu'il avoit sur li, et remetoit sa
cote à armer desus li, et se dressoit sur ses estriers, et estendoit les bras atout l'espée, et crioit:
«Chasteillon, chevalier! où sont mi preudome?» Quant il se retournoit et veoit que li Turc estoient entré par l'autre
chief, il leur recouroit sus, l'espée au poing, et les enchaçoit; et ainsi fit par trois foiz en la manière desus dite.
Quant
li amiraus des
galies m'ot amené devers ceus qui furent pris à terre, je enquis à ceus qui estoient entour li; ne
onques ne trouvai qui me deist comment il fu pris, fors que tant que
messires Jehans Fouinons, li bons chevaliers, me dist que, quant on l'amenoit pris vers
la Massourre, il trouva un Turc qui estoit montez sur le cheval
monsigneur Gauchier de Chasteillon; et estoit la culière toute sanglante du cheval. Et li demanda que il avoit fait de celi à cui li chevaus estoit; et li respondi que il li avoit copé la gorge tout à cheval, si comme il aparut à la culiere qui en estoit ensanglantée du sanc.
Il avoit un mout vaillant home en l'
ost, qui avoit à nom
Jaque de Castel, évesque de
Soissons. Quant il vit que nos gens s'en revenoient vers
Damiete, il qui avoit grant desirier de aler à Dieu, ne s'en vout pas revenir en la terre dont il estoit nez;
ainçois se hasta d'aler avec Dieu, et
feri des esperons, et assembla aus Turs touz seul, qui à leur espées l'occistrent et le mistrent en la compaingnie Dieu, au nombre des martirs.
Endementres que
li roys atendoit le paiement que sa gent fesoient aus Turs pour la delivrance de
son frère le comte de Poitiers,
uns Sarrazins mout bien atiriés et mout beaus hom de cors, vint au
roy et li presenta lait pris en pos, et fleurs de diverses coleurs et manières, de par les enfans
le Nasac, qui avoit esté soudans de
Babiloine; et li fist le présent en françois. Et
li roys li demanda où il avoit apris françois; et il dist que il avoit esté crestiens; et
li roys li dist:
«Alez-vou-en, que à vous ne parlerai-je plus.»
Je le trais d'une part et li demandai son
couvine. Et il
me dist qu'il avoit esté nez de
Provins, et que il estoit venus en Egypte avec
le roy Jehan, et que il estoit mariez en Egypte et grans riches hom. Et
je li diz:
«Ne savez-vous pas bien que se vous mouriés en ce point, que vous seriez damnez et iriez en enfer?» Et il dist:
«Oyl (car il estoit certeins que nulle loys n'estoit si bonne comme la crestienne);
mais je dout, se je aloie vers vous, la povreté là où je seroie et le reproche. Toute jour me diroit l'on: “Veez ci le renié!„ Si aim mieus vivre riche et aise, que je me meisse en tel point comme je voi.» Et
je li dis que li reproches seroit plus grans au jour du jugement, là où chascuns verroit son mesfait, que ne seroit ce que il
me contoit. Mout de bone paroles li diz qui guères ne valurent. Ainsi se departy de
moy, n'
onques plus ne le vi.