Quant li paiemens fu fais, li conseils
le roy qui le paiement avoit fait vint à li, et li distrent que li Sarrazin ne vouloient delivrer
son frère jusques à tant que il eussent l'argent par devers eus.
Aucun du conseil y ot qui ne louoient mie
le roy que il leur delivrast les deniers jusques à tant que il reust
son frère. Et
li roys respondi que il leur deliverroit, car il leur avoit
convent; et il li retenissent les
seues
convenances se il
cuidoient bien faire. Lors dist
messires Phelipes de Nemoes au
roy que on avoit forconté aus Sarrazins une balance de dix mille livres.
Et
li roys se courouça trop fort, et dist que il vouloit que on leur rendist les dix mille livres, avant que il partisist dou flum. Et lors
je passai
monsigneur Phelipe sus le pié, et dis au
roy qu'il ne le creust pas, car il ne disoit pas
voir; car li Sarrazin estoient li plus saige conteur qui fussent au monde. Et
messires Phelippes dist que
je disoie
voir, car il ne le disoit que par moquerie. Et
li roys dist que male encontre eust tele moquerie:
«Et vous commant, dist
li roys à
monsigneur Phelippe, sur la foy que me devez comme mes hom que vous estes, que se les dix mille livres ne sont païées, que vous les facez paier sans nulle faute.»
Mout de gens avoient loué au
roy que il se traisist en sa nef, qui l'atendoit en mer, pour li oster des mains aus Sarrazins.
Onques
li roys ne vout nullui croire;
ainçois disoit que il ne partiroit du flum, aussi comme il l'avoit
convent, tant que il leur eust paié deus cens mille livres. Si tost comme li paiemens fu fais,
li roys, sanz ce que nulz ne l'en prioit, nous dist que desoremais estoit ses sermenz quitiez, et que nous nous partissions de là, et alissions en la nef qui estoit en la mer. Lors s'esmut nostre
galie, et alames bien une grant lieue avant que li uns ne parlast à l'autre, pour la mesaise que nous avions de la
prison du
comte de Poitiers. Lors vint
messires Phelippes de Monfort en un galion, et escria au
roy: «Sire, sire, parlés à
vostre frere le comte de Poitiers, qui est en cel autre vessel.» Lors escria
li roys: «Alume, alume!» Et si fist l'on. Lors fu la joie si grans comme elle pot estre plus entre nous.
Li roys entra en sa nef, et nous aussi. Uns povre pechierres ala dire à
la comtesce de Poitiers qu'il avoit veu
le comte de Poitiers delivré; et elle li fist donner vint livres de parisis.