Aussi comme Dieus vout, qui n'oublie pas les siens, il fut
acordé, entour soleil couchant, que nous serions delivré. Lors nous ramena l'on, et mist l'on nos quatre
galies à terre. Nous requeismes que on nous lessast aler. Il nous dirent que non feroient jusques à ce que nous eussions mangié:
«Car ce seroit honte aus amiraus, se vous partiéz de nos
prisons à jeun.»
Et nous requeismes que on nous donnast la
viande, et nous mangerions; et il nous distrent que on l'estoit alé
querre en l'
ost. Les
viandes que il nous donnèrent, ce furent begniet de fourmaiges qui estoient roti au soleil pour que li ver n'i venissent, et œuf dur cuit de quatre jours ou de cinc; et pour honneur de nous, on les avoit fait peindre par dehors de diverses colours.
On nous mist à terre; et en alames vers
le roy, qu'il amenoient de paveillon là où il l'avoient tenu, vers le flum; et venoient bien vint mille Sarrazin, les espées ceintes, tuit après li à pié. Au flum, devant
le roy avoit une
galie de
Genevois, là où il ne paroit que uns seul hom desur.
Maintenant que il vit
le roy sur le flum, il sonna un siblet; et au son du siblet saillirent bien de la sente de la
galie quatre-vins arbalestriers bien appareillié, les arbalstres montées, et mistrent
maintenant les
carriaus en coche. Tantost comme li Sarrazin les virent, il touchièrent en fuie aussi comme brebis; que
onques n'en demoura avec
le roy, fors que deus ou trois. Il getèrent une planche à terre pour requeillir
le roy, et
le comte d'Anjou son frère, et
monsigneur Geffroy de Sergines, et
monsigneur Phelippe de Annemos, et le marechal de France que on appeloit
du Meis, et
le maistre de la Trinité et
moy.
Le comte de Poitiers il retindrent en
prison jusques à tant que
li roys lour eust fait paier les deus cens mille livres que il leur devoit faire paier, avant que il partisist du flum, pour leur rançon.
Le samedi après l'Ascension, liquel samedis est l'endemain que nous fumes delivré, vindrent prendre congié du
roy li
cuens de
Flandres, et li
cuens de
Soissons, et plusieur des autres riches homes qui furent pris es
galies.
Li roys leur dist ainsi, que il li sembloit que il feroient bien se il atendoient jusques à ce que li
cuens de
Poitiers, ses frères, fust delivrés. Et il distrent que il n'avoient povoir; car les
galies estoient toutes appareilliées. En leur
galies montèrent et s'en vindrent en France, et en amenèrent avec eus
le bon comte Pierron de Bretaingne, qui estoit si malades que il ne vesqui puis que troiz semainnes, et mourut sur mer.