Le roy et nous, que il durent delivrer dès soleil levant, il nous tindrent jusques à soleil couchant; ne
onques ne mangeames, ni li amiral aussi;
ainçois furent en desputoison tout le jour. Et disoit uns amiraus pour ceus qui estoient de sa partie:
«Signour, se vous me voulez croire, moy et ceus qui sont ci de ma partie, nous occirons
le roy et ces riches homes qui ci sont; car de ça quarante ans n'avons mais garde; car leur enfan sont petit, et nous avons
Damiete devers nous; par quoy nous le povons faire plus seurement.»
Uns autres Sarrazins, qui avoit non
Sebreci, qui estoit nés de
Morentaigne, disoit encontre et disoit ainsi:
«Se nous occions
le roy après ce que nous avons occi
le soudanc, on dira que li Egypcien sont les plus mauvaises gens et les plus desloiaus qui soient ou monde.» Et cil qui vouloit que on nous occeist, disoit encontre:
«Il est bien
voirs que nous nous sommes trop malement deffait de
nostre soudanc que nous avons tué; car nous sommes allé contre le commandement
Mahommet, qui nous commande que nous gardons le nostre signour aussi comme la prunelle de nostre œil; et vez-ci en cest livre le commandement tout escrit. Or escoutez, fait-il,
l'autre commandement
Mahommet qui vient après.»
Il leur tournoit un foillet ou livre que il tenoit, et lour moustroit l'autre commandement
Mahommet, qui estoit tels:
«En l'asseurement de la foy, occi l'ennemi de la loy. — Or gardez comment nous avons mesfait contre les commandemens
Mahommet, de ce que nous avons tué
nostre signour; et encore ferons-nous pis se nous ne tuons
le roy, quelque asseurement que nous aions donné; car c'est li plus forz ennemis que la loy paiennime ait.»
Nostre mors fu presque
acordée: dont il avint ainsi, que uns amiraus qui estoit nostre adversaires,
cuida que on nous deust touz occire, et vint sur le flum, et commença à crier en sarrazinnois à ceus qui les
galies menoient, et osta sa
touaille de sa teste et lour fist un signe de sa
touaille. Et
maintenant il nous desancrèrent, et nous remenèrent bien une grant lieue arière vers
Babiloine. Lors
cuidames-nous estre tuit perdu, et y ot maintes lermes plorées.