Dès que
li soudans fu occis, on fist venir les estrumens au
soudanc devant la tente du
roy, et dist-on au
roy que li amiral avoient eu grant vouloir et conseil de li faire soudanc de
Babiloine. Et il
me demanda se
je
cuidoie que il eust pris le royaume de
Babiloine, se il li eussent presenté. Et
je li dis que il eust mout fait que fous, à ce que il avoient
leur signour occis; et il
me dist que vraiment il ne l'eust mie refusé. Et sachiez que on dist que il ne demeura pour autre chose, que pour ce que il disoient que
li roys estoit li plus fermes crestiens que on peust trouver. Et cest exemple en monstroient, à ce que quant il se partoit de la heberge, il prenoit sa croix à terre, et seignoit tout son cors. Et disoient que se
Mahommez leur eust tant de
meschief soufert à faire, il ne le creussent jamais; et disoient que se celle gent fesoient soudanc de li, il les occiroit touz, ou il deviendroient crestien.
Après ce que les
convenances furent
acordées du
roy et des amiraus et jurées, fu
acordé que il nous deliverroient l'endemain de l'Ascension; et que si tost comme
Damiete seroit delivrée aus amiraus, on deliverroit le cors
le roy et les riches homes qui avec li estoient, aussi comme il est devant dit. Le jeudi au soir, cil qui menoient nos quatre
galies vindrent ancrer en mi le flum devant le pont de
Damiete, et firent tendre un paveillon devant le pont, là où
li roys descendi. Au soleil levant,
messires Geffroys de Sergines ala en
la ville, et fist rendre
la ville aus amiraus. Sur les tours de
la ville mistrent les enseignes au soudanc. Li chevalier sarrazin se mistrent en la ville, et commencierent à boivre des vins et furent tuit yvre: dont li uns d'eus vint à nostre
galie, et trait s'espée tout ensanglantée, et dist que endroit de li il avoit tué six de nos gens.
Avant que
Damiete fust rendue avoit l'on
recueilli
la royne en nos nefs, et toute nostre gent qui estoient en
Damiete, fors que les malades qui estoient en
Damiete. Li Sarrazin les devoient garder par leur serment: il les tuerent touz. Les engins
le roy, que il devoient garder aussi, il les decopèrent par pieces. Et les chairs salées que il devoient garder pour ce que il ne manjuent point de porc, il ne les gardèrent pas;
ainçois firent un lit des engins, un lit de bacons et un autre de gens mors, et mistrent le feu dedans; et y ot si grant feu que il dura le vendredi, le samedi et le dymache.