Li
sairement que li amiral devoient faire au
roy furent devisié, et furent tel: que se il ne tenoient au
roy les
couvenances, que il fussent aussi honni comme cil qui par son pechié aloit en pelerinaige à
Mahomet, à
Maques, sa teste descouverte; et fussent aussi honni comme cil qui lessoient lour femme et les reprenoient après. De ce cas, ne peuent lessier lour femme, à la loi de
Mahomet, que jamais la puissent ravoir, se il ne voit un autre homme gesir à li avant que il la puisse ravoir.
Li tiers
sairement fu tels: que se il ne tenoient les
couvenances au
roy, que il fussent aussi honni comme li Sarrazin qui manjue la char de porc.
Li roys prist les
sairemens desus diz des amiraus à gré, parce que
maistres Nicholes d'Acre, qui savoit le sarrazinois, dit que il ne les pooient plus forz faire selonc lour loi.
Quant li amiral orent juré, il firent mettre en escrit le
sairement que il vouloient avoir dou
roy, qui fu tels, par le consoil des
proveres qui s'estoient renoié devers eus; et disoit li escris ainsi: que se
li roys ne tenoit les
couvenances aus amiraus, que il fust aussi honnis comme li Crestiens qui renie Dieu et sa Mere, et privez de la compaingnie de ses douze compaingnons, de touz les sains et de toutes les saintes. A ce s'
acordoit bien
li roys. Li dareniers poins dou
sairement fu tels, que se il ne tenoit les
couvenances aus amiraus, que il fust aussi honnis comme li Crestiens qui renoie Dieu et sa loy, et qui en despit de Dieu crache sur la croiz et marche desus.
Quant
li roys oy ce, il dist que, se Dieu plaist, cesti
sairement ne feroit-il jà. Li amiral envoierent
maistre Nichole, qui savoit le sarrazinnois, au
roy, qui dist au
roy teles paroles:
«Sire, li amiral ont grant despit de ce que il ont juré quanque vous requeistes, et vous ne voulez jurer ce que il vous requierent; et soiés certeins que se vous ne le jurez, il vous feront la teste coper, et à toute vostre gent.»
Li roys respondi que il en povoient faire lour volenté; car il amoit mieus mourir bons crestiens que ce que il vesquist ou courrous Dieu et sa Mere.
Li patriarches de Jerusalem, vieus hom et anciens de l'aage de quatre-vins ans, avoit
pourchacié asseurement des Sarrazins, et estoit venus vers
le roy pour li aidier à
pourchacier sa delivrance. Or est tele la coustume entre les Crestiens et les Sarrazins, que quant li roys ou li soudans meurt, cil qui sont en messagerie, soit en paiennime ou en crestienté, sont
prison et esclave; et pour ce que
li soudans qui avoit donné la seurté au
patriarche fu mors,
li diz patriarches fu prisonniers aussi comme nous fumes. Quant
li roys ot faite sa response, li uns des amiraus dist que ce consoil li avoit donné
li patriarches, et dist aus paiens:
«Se vous me voulés croire, je ferai
le roy jurer; car je li ferai la teste dou
patriarche voler en son geron.»
Il ne le vorent pas croire,
ainçois pristrent
le patriarche et le leverent de
delez
le roy, et le lierent à une perche d'un paveillon les mains darieres le dos, si estroitement que les mains li furent aussi enflees et aussi grosses comme sa teste, et que li sans li sailloit parmi les ongles.
Li patriarches crioit au
roy: «Sire, pour Dieu, jurez seulement; car je pren tout le pechié sus l'ame de moy dou
sairement que vous ferez, puisque vous le béez bien à tenir.» Je ne sai pas comment li
sairement fu
atiriez; mais li amiral se tindrent bien apaié dou
sairement
le roy et des autres riches homes qui là estoient.