Il en vindrent bien trente, les espées toutes nues es mains, à nostre
galie, et au col les haches danoises.
Je demandai à
monsigneur Baudouin d'Ibelin, qui savoit bien le sarrazinnois, que celle gent disoient; et il
me respondi que il disoient que il nous venoient les testes tranchier. Il y avoit tout plein de gens qui se confessoient à
un frère de la Trinité... Mais endroit de
moy ne
me souvint
onques de pechié que
j'eusse fait;
aincois
m'apensai que quant plus me deffenderoie et plus me
ganchiroie, et pis me vauroit. Et lors me seignai et m'agenoillai aus piés de l'un d'eus qui tenoit une hache danoise à charpentier, et dis:
«Ainsi mourut sainte Agnès.»
Messires Guis d'Ybelin, connestables de Cypre, s'agenoilla encoste
moy et se confessa à
moy; et
je li dis:
«Je vous asol de tel povoir comme Dieus m'a donné.» Mais quant
je me levai d'
ilec, il ne
me souvint
onques de chose que il
m'eust dite ne racontée.
Il nous firent lever de là où nous estions, et nous mistrent en
prison en la sente de la
galie; et
cuidièrent mout de nostre gent que il l'eussent fait pour ce que il ne nous vouloient pas assaillir touz ensemble, mais pour nous tuer l'un après l'autre.
Leans fumes à tel
meschief, le soir, que nous gisions si à estroit, que mi pié estoient endroit
le bon comte Pierron de Bretaingne, et li sien estoient endroit le mien visaige.
L'endemain nous firent traire li amiral de la
prison là où nous estions, et nous dirent ainsi leur
messaige que nous alissions parler aus amiraus, pour renouveler les
convenances que
li soudans avoit eues à nous; et nous dirent que nous fussions certein que se
li soudans eust vescu, il eust fait coper la teste au
roy et à nous touz aussi. Cil qui y porent aler y alèrent.
Il
acordèrent aus amiraus en tel manière, que si tost comme on leur averoit delivrée
Damiete, il deliverroient
le roy et les autres riches homes qui là estoient; car le menu peuple en avoit fait mener
li soudans vers
Babiloine, fors que ceus qu'il avoit fait tuer. Et ceste chose avoit-il faite contre les
convenances que il avoit au
roy: par quoy il semble bien que il nous eust fait tuer aussi, si tost comme il eust eu
Damiete. Et
li roys lour devoit jurer aussi à leur faire gré de deus cens mille livres avant que il partisist du flum et deus cens mille livres en
Acre. Li Sarrazin, par les
convenances qu'il avoient au
roy, devoient garder les malades qui estoient en
Damiete, les arbalestres, les armeures, les chairs salées et les engins jusques à tant que
li roys les envoieroit
querre.