Lors fist entrer
li soudans les riches homes en quatre
galies, pour mener vers
Damiete. En la
galie là où
je fu mis, fu li bons
cuens
Pierres de Bretaingne, li
cuens
Guillaumes de Flandres, li bons
cuens
Jehans de Soissons,
messires Imbers de Biaujeu, connestables de France, li bons chevaliers
messires Baudouins d'Ybelin et
messires Guis, ses frères, i furent mis. Cil qui nous conduisoient en la
galie nous arivèrent devant une herberge que
li soudans avoit fait tendre sur le flum, de tele manière comme vous orrez. Devant celle herberge, avoit une tour de planches de sapin et close entour de toile tainte; et la porte estoit de la herberge. Et dedans celle porte, estoit un paveillons tendus, là où li amiral, quant il aloient parler au
soudanc, lessoient leur espées et leur
harnois. Après ce paveillon, ravoit une porte comme la première, et par celle porte entroit l'on en un grant paveillon qui estoit la sale au
soudanc. Après la sale, avoit une tele tour comme devant, par laquele l'on entroit en la chambre
le soudanc. Après la chambre
le soudanc, avoit un
prael; et enmi le
prael, avoit une tour pus haute que toutes les autres, là où
li soudans aloit veoir tout le pays et tout l'
ost. Du
prael movoit une alée qui aloit au flum, là où
li soudans avoit fait tendre en l'eau un paveillon pour aler baignier. Toutes ces herberges estoient closes de treillis de fust, et par dehors estoient li treillis couvert de toiles yndes, pour ce que cil qui estoient dehors ne peussent veoir dedans; et les tours toutes quatre estoient couvertes de toile.
Nous venimes le jeudi devant l'Ascencion en ce lieu, là où ces herberges estoient tendues. Les quatre
galies là où entre nous estions en
prison, ancra l'on au devant de la herberge
le soudanc. En un paveillon qui estoit assez près des herberges
le soudanc descendi-on
le roy.
Li soudans avoit ainsi
atirié: que le samedi devant l'Ascension on li renderoit
Damiete, et il renderoit
le roy.