Li conseil au
soudanc essaièrent
le roy en la manière que il nous avoient essaiés, pour veoir se
li roys leur voudroit promettre à delivrez nuls des chastiaus du
Temple ne de l'
Ospital, ne nulz des chastiaus aus barons du païs; et ainsi comme Dieus vout,
li roys lour respondit tout en la manière que nous avions respondu. Et il le menacièrent et li distrent que puisque il ne le vouloit faire, que il le feroient mettre es bernicles. Bernicles est le plus grief tourmens que l'on puisse souffrir; et son dui tison ploiant, endenté au
chief; et entrent li uns en l'autre, et sont lié à fors corroies de buef au
chief. Et quant il veulent mettre les gens dedans, si les couchent sus leur costez et leur mettent les jambes parmi les chevilles dedans, et puis si font asseoir un home sur les tisons; dont il advient ainsi qu'il ne demourra jà demi pié entier de os qu'il ne soit touz debrisiés. Et pour faire au pis que il peuvent, au
chief de trois jours que les jambes sont enflées, si remettent les jambes enflées dedans les bernicles, et rebrisent tout derechief. A ces menaces leur respondi
li roys que il estoit leur prisonniers, et que il povoient faire de li leur volenté.
Quant il virent que il ne pourroient vaincre
le bon roy par menaces, si revindrent à li et li demandèrent combien il voudroit donner au
soudanc d'argent, et avec ce leur rendist
Damiete. Et
li roys leur respondi que se
li soudans vouloit prendre raisonnable somme de deniers de li, que il manderoit à
la royne que elle les paiast pour leur delivrance. Et il distrent:
«Comment est-ce que vous ne nous voulez dire que vous ferez ces choses?» Et
li roys respondi que il ne savoit se
la royne le voudroit faire, pour ce que elle estoit sa dame. Et lors li conseil s'en rala parler au
soudanc, et raportèrent au
roy que se
la royne vouloit paier dix cens mile besans d'or, qui valoient cinc cens mile livres, que il deliverroit
le roy.
Et
li roys leur demanda par leur sermens se
li soudans les deliverroit pour tant, se
la royne le vouloit faire. Et il ralèrent parler au
soudanc, et au revenir firent le serment au
roy que il le deliverroient ainsi. Et
maintenant que il orent juré,
li roys dist et promist aus amiraus que il paieroit volentiers les cinc cens mille livres pour la delivrance de sa gent, et
Damiete pour la delivrance de son cors; car il n'estoit pas tel que il se deust desraimbre à deniers. Quant
li soudans oy ce, il dist:
«Par ma foi! larges est
li Frans quant il n'a pas
barguignié sur si grant somme de deniers. Or li alés dire, fist
li soudans, que je li doing cent mile livres pour la reançon paier.»