Or vous lairai ici, si vous dirai comment
li roys fu pris, ainsi comme il meismes le me conta. Il me dist que il avoit lessié la
seue bataille, et s'estoit mis, entre li et
monsigneur Geffroy de Sargines, en la bataille de
monsigneur Gautier de Chasteillon, qui fesoit l'arière-garde. Et me conta
li roys que il estoit montez sur un petit
roncin, une houce de soie vestue; et dist que darière li ne demoura de touz chevaliers ne de touz serjans, que
messires Geffroys de Sergines, liquel amena
le roy jusques au
quazel là où
li roys fu pris; en tel manière que
li roys me conta que
les sires Geffroys de Sergines le deffendoit des Sarrazins, aussi comme li bons vallez deffent le hanap son signeur des mouches; car toutes les foiz que li Sarrazin l'aprochoient, il prenoit son espié, que il avoit mis entre li et l'arçon de sa selle et le metoit dessous s'essele, et leur recouroit sus, et les chassoit en sus du
roy.
Et ainsi mena
le roy jusques au
kasel; et le descendirent en une maison, et le couchierent ou giron d'une bourjoise de
Paris aussi comme tout mort, et
cuidoient que il ne deust jà veoir le soir.
Illec vint
mes sires Phelippes de Montfort, et dist au
roy que il veoit l'amiral à qui il avoit traitié de la trève; que se il vouloit, il iroit à li pour la trève refaire en la manière que li Sarrazin vouloient.
Li roys le pria que il y alast, et que il le vouloit bien. Il ala au Sarrazin; et li Sarrazins avoit ostée sa
touaille de sa teste, et osta son anel de son doy pour asseurer que il tendroit la trève.
Dedans ce, avint une si grans
mescheance à nostre gent, que uns traitres serjans, qui avoit à nom
Marcel, commença à nostre gent:
«Signour chevalier, rendés-vous, que
li roys le vous mande; et ne faits pas occire
le roy!» Tuit
cuidièrent que
li roys leur eust mandé, et rendirent leur espées aus Sarrazins. Li amiraus vit que li Sarrazin amenoient nostre gent prins. Li amiraus dist à
mon signour Phelippe que il n'aferoit pas que il donnast à nostre gent treves, car il veoit bien que il estoient pris
Or avint ainsi à
monseigneur Phelippe que toute nostre gent estoient pris, et il ne le fu pas pour ce que il estoit messagiers. Or à une autre mauvaise manière ou païs en la paiennime, que quant li roys envoie ses
messaiges au soudanc, ou li soudans au roy, et li roys meurt ou li soudans avant que li
messaige revieingnent, li
messaige sont
prison ou esclave, de quelque part que il soient, ou crestien ou sarrazin.