Quant
li roys vit que il n'avoit povoir d'
illec demeurer que mourir ne le convenist, li et sa gent, il ordena et
atira que il mouveroit le mardi au soir, à l'
anuitier, après les octaves de Pasques, pour revenir à
Damiete. Il fist parler aus mariniers qui avoient les
galies, comment il leur convenoit
recueillir tous les malades et les mener à
Damiete.
Li roys commanda à
Josselin de Cornaut et à ses frères et aus autres engingnours, que il copassent les cordes qui tenoient les pons entre nous et les Sarrazins; et riens n'en firent.
Nous nous requeillimes le mardi après diner de
relevée, et dui de mes chevaliers que
je avoie de
remanant, et ma mesnie. Quant ce vint que il commença à
anuitier,
je dis à mes mariniers que il tirassent leur ancre et que nous en alissions aval; et il distrent que il n'oseroient, pour ce que les
galies au
soudanc, qui estoient entre nous et
Damiete, nous occiroient. Li marinier avoient fait grans feus pour requeillir les malades dedans leur
galies, et li malade s'estoient trait sur la rive de flum. Tandis que
je prioie les mariniers que nous en alissions, li Sarrazin entrèrent en l'
ost, et vi à la clarté du feu que il occioient les malades sus la rive.
Endementres que il tiroient leur ancre li marinier qui devoient mener les malades, coupèrent les cordes de leurs ancres et de leur
galies, et acoururent par à coste nostre petit vaissel, et nous enclorent li un d'une part et li autre d'autre part, que peu se ala que il ne nous afondrerent en l'yaue. Quant nous fumes eschapei de ce peril, et nous en alions contreval le flum,
li roys, qui avoit la maladie de l'
ost et
menoison mout fort, se fust bien garantis es
galies, se il
vousist; mais il dist que, se Dieu plaisoit, il ne lairoit jà son peuple. Le soir, se
pasma par pluseurs foiz; et pour la fort
menoison que il avoit, li convint coper le font de ses braies, toutes les foiz que il descendoit pour aler à la chambre.
L'on escrioit à nous qui nagions par l'yaue, que nous attendissions
le roy; et quant nous ne le voulions atendre, l'on traioit à nous de
quarriaus: par quoy il nous convenoit arester tant que il nous donnoient congié de nagier.