Pour les bleceures que
j'oi le jour de quaresme-prenant, me prist la maladie de l'
ost, de la bouche et des jambes, et une double tierceinne, et une reume si grans en la teste que la reume
me filoit par les nariles; et pour les dites maladies, acouchai au lit malades en la mi-quaresme: dont il avint ainsi que mes prestres
me chantoit la messe devant mon lit, en mon paveillon; et avoit la maladie que
j'avoie. Or avint ainsi que en son sacrement il se
pasma. Quant
je vi que il vouloit cheoir,
je qui avoie ma
cote vestue, sailli de mon lit touz
deschaus, et l'embraçai, et le deis que il feist tout à trait et tout belement son sacrement; que
je ne le lairoie tant que il l'averoie tout fait. Il evint à soi, et fist son sacrement, et parchanta sa messe tout entierement; ne
onques puis ne chanta.
Après ces choses, prist li conseil
le roy et li conseil
le soudanc journée d'eus
acorder. Li traitiés de l'
acorder fu tels, que l'on devoit rendre au
soudanc
Damiete, et
li soudans devoit rendre au
roy le reaume de
Jerusalem; et li dut garder
li soudans les malades qui estoient à
Damiete, et les chars salées (pour ce que il ne mangeoient point de porc), et les engins
le roy, jusques à tant que
li roys pourroit renvoier
querre toutes ces choses.
Il demandèrent au conseil
le roy quel seurté il donroient par quoy il reussent
Damiete. Li consaus
le roy leur offri que il detenissent un des frères
le roy tant que il reussent
Damiete, ou
le comte d'Anjou, ou
le comte de Poitiers. Li Sarrazin distrent que il n'en feroient riens, se on ne lour lessoit le cors
le roy en gaige; dont
messires Geffrois de Sergines, li bons chevaliers, dist que il ameroit mieus que li Sarrazin les eussent touz mors et pris, que ce que il leur fust reprouvé que il eussent lessié
le roy en gaige.
La maladie commença à
engregier en l'
ost en tel manière, que il venoit tant de char morte es gencives à nostre gent, que il convenoit que barbier ostassent la char morte, pour ce que il peussent la
viande maschier et
avaler aval. Grans pitiés estoit d'oïr braire les gens parmi l'
ost ausquels l'on copoit la char morte; car il breoient aussi comme femmes qui traveillent d'enfan.