Livre des saintes paroles et des bons faiz nostre roy saint Looys

   Quant li roys et li baron virent ce, il s'acordèrent que li roys feist passer son ost par devers Babilone, en l'ost le duc de Bourgoingne, qui estoit sus le flum qui aloit à Damiette. Pour requerre sa gent plus sauvement, fist li roys faire une barbacane devant le pont qui estoit entre nos deus os, en tel manière que l'on ovoit entrer de deus pars en la barbacane à cheval. Quant la barbacane fu arée, si s'arma touz li ost le roy, et y ot grant assaut de Turs à l'ost le roy. Toutevoiz ne se mut li roys ne ses gens, jusques à tant que touz li harnoiz fu portez outre et lors passa li roys et sa bataille après li, fors que monsigneur Gautier de Chasteillon, qui fist l'ariere-garde. Et à l'entrer en la barbacane, rescout messires Erars de Walery monsigneur Jehan, son frère, que li Turc enmenoient pris. Quant touz li ost fu entrez dedans, cil qui demeurèrent en la barbacane furent à grant meschief; car la barbacane n'estoit pas haute, si que li Turc leur traioient de visée à cheval, et li Sarrazin à pié lour getoient les motes de terre enmi les visaiges. Tuit estoient perdu, se ce ne fust li cuens d'Anjou (qui puis fu roys de Sezile), qui les ala rescourre et les enmena sauvement. De celle journée emporta le pris messires Geffroys de Mussanbourc, le pris de touz ceus qui estoient en la barbacane.
   La vegile de quaresme-prenant, vi une merveille que je vous vueil raconter; car ce jour meismes, fu mis en terre messires Hues de Landricourt, qui estoit avec moy à banière. Là où il estoit en biere en ma chapelle, six de mes chevaliers estoient apuié sur pluseurs sacs pleins d'orge; et pour ce que il parloient haut en ma chapelle et que il faisoient noise au prestre, je leur alai dire que il se teussent, et leur dis que vilaine chose estoit de chevaliers et de gentiz homes qui parloient tandis que l'on chantoit la messe. Et il me commencierent à rire, et me distrent en riant que il li remariroient sa femme. Et je les enchoisonnai et leur dis que teles paroles n'estoient ne bones ne beles, et que tost avoient oublié leur compaingnon. Et Dieus en fist tele vengance que l'endemain fu la grans bataille du quaresme-prenant, dont il furent mort ou navré à mort; par quoy il convint leurs femmes remarier toutes six.