Après les deus batailles devant dites, commencièrent à venir li grant
meschief en l'
ost; car au
chief de nuef jours, li cors de nos gens que il avoient tuez vindrent au desus de l'yaue; et dit l'on que c'estoit pour ce que li fiel en estoient pourri. Il en vindrent flotant jusques au pont qui estoit entre nos deus
os, et ne porent passer, pour ce que li pons joingnoit à l'yaue. Si grant foison en y avoit, que touz li fluns estoit pleins de mors dès l'une rive jusques à l'autre, et de lonc bien le giet d'une pierre menue.
Li roys avoit loez cent
ribaus, qui bien y furent huit jours. Les cors aus Sarrazins, qui estoient retaillié, getoient d'autre part du pont, et laissoient aler d'autre part l'yaue; et les crestiens fesoient mettre en grans fosses, les uns avec les autres. Je y vi les chamberlans au
comte d'Artois, et mout d'autres, qui
queroient leur amis entre les mors; ne
onques n'oy dire que nulz y fust retrouvez.
Nous ne mangions nulz poissons en l'
ost tout le quaresme, mais que bourbetes; et les bourbetes manjoient les gens mors, pour ce que ce sont glout poisson. Et pour ce
meschief, et pour l'enfermeté dou païs, là où il ne pleut nulle foiz goutte d'yaue, nous vint la maladie de l'
ost, qui estoit tele, que la chars de nos jambes devenoit tavelés de noir et de terre, aussi comme une vieille
heuse; et à nous qui avions tele maladie, venoit chars pourrie es gencives; ne nulz ne eschapoit de celle maladie, que mourir ne l'en convenist. Li signes de la mort estoit tel, que là où li nez seignoit, il convenoit mourir.
A la quinzaine après, li Turc, pour nous affamer (dont mout de gent se merveillièrent), prirent pluseurs de leur
galies de sus nostre
ost, et les firent trainer par terre et mettre au flum qui venoit de
Damiete, bien une lieue desous nostre
ost. Et ces
galies nous donnèrent famine; que nus ne nous osoit venir de
Damiete pour aporter garnison contremont l'yaue, pour leur
galies. Nous ne seumes
onques nouvelles de ces choses jusques à tant que uns vaisselez au
comte de Flandres, qui eschapa d'eus par force d'yaue, le nous dist, et que les
galies du
soudanc avoient bien gaaingnié quatre-vins de nos
galies qui estoient venues de vers
Damiete, et tuées les gens qui estoient dedans. Par ce avint si grans chiertés en l'
ost que tantost la Pasque fu venue, uns beu valoit en l'
ost quatre-vins livres, et uns moutons trente livres, et uns pors trente livres, et un œs douze deniers, et un muis de vin dix livres.