Or revenons à nostre matiere et disons ainsi que
li soudans, qui mors estoit, avoit
un sien fil de l'aage de vingt-cinq ans, saige et
apert et malicieus; et pour ce que il doutoit que il ne le desheritast, li donna un reaume que il avoit en Orient.
Maintenant que
li soudans fu mors, li amiral l'envoièrent
querre; et sitost comme il vint en Egypte, il osta et tolli au seneschal
son pere, et au connestable et au mareschal, les verges d'or, et les donna à ceus qui estoient venu avec li d'Orient. Quant il virent ce, il en orent si grant despit, et tuit li autre aussi qui estoient du conseil
le père, pour la deshonour que il leur avoit faite. Et pour ce que il doutoient que il ne feist autel d'eus comme
ses pères avoit fait à ceus qui avoient pris
le comte de Bar et
le comte de Monfort, ainsi comme il est devant dit, il
pourchacièrent tant à ceus de la Haulequa (qui sont de vant nommé, qui le cors du soudanc doivent garder), que il leur orent
convent que à leur requeste il leur occiroient
le soudanc.