Pour ce que il nous convient poursuivre nostre matiere, laquele il nous convient un peu entrelacier, pour faire entendre comment li soudanc tenoient leur gent ordenéement et
aréement. Et est
voirs que le plus de leur chevalerie il avoient fait de gens estranges, que marcheant prenoient en estranges terres pour vendre; et il les achetoient mout volentiers et chierement. Et ces gens que il menoient en Egypte, prenoient en Orient, parce que quant li un des roys d'Orient avoit desconfit l'autre, si prenoit les povres gens que il avoit conquis, et les vendoit aus marcheans; et li marcheant les revenoient vendre en Egypte.
La chose estoit si ordenée que les enfants, jusques à tant que barbe leur venoit, li soudans les
nourrissoit en sa maison; en tel manière que selonc ce que il estoient, li soudans leur faisoit faire ars à leur point; et si tost comme il enforçoient, il getoient leur foibles ars en l'artillerie au soudanc, et li maistres artilliers leur
bailloit ars si fors comme il les povoient teser.
Les armes au soudanc estoient d'or; et teles armes comme li soudans portoit, portoient cele joene gent; et estoient appelé bahariz.
Maintenant que les barbes leur venoient, li soudans les fesoit chevaliers. Et portoient les armes au soudanc fors que tant que il y avoit difference, c'est à savoir enseignes vermeilles, roses, ou bendes vermeilles, ou oisiaus, ou autres enseignes que il metoient aus armes d'or, teles comme il leur plaisoit.
Et ceste gent que je vous nomme, appeloit l'on
de la Haulequa: car li baharis gisoient dedans les tentes au soudanc. Quant li soudans estoit en l'
ost, cil de la Haulequa estoient logié entour les héberges le soudanc, et establi pour le cors le soudanc garder. A la porte de la herberge le soudanc, estoient logié en une petite tente li portier le soudanc, et sui menestrier, qui avoient cors sarrazinnois et tabours et
nacaires. Et fesoient tel
noise au point du jour et à l'
anuitier, que cil qui estoient
delez eus ne povoient entendre li uns l'autre; et clerement les oioit l'on parmi l'
ost. Ne li menestrier ne fussent jà si hardi que il sonnassent leur estrumens de jour, ne mais que par le maistre de la Haulequa: dont il estoit ainsi que quant li soudans vouloit chargier, il envoioit
querre le maistre de la Haulequa et li fesoit son commandement. Et lors li maistres fesoit sonner ls estrumens au soudanc, et lors touz li
ost venoit pour oïr le commandement au soudanc: li maistres de la Hauleca le disoit, et touz li
ost le fesoit.
Quant li soudans se combatoit, les chevaliers de la Hauleca, selonc ce que il se prouvoient bien en la bataille, li soudans en fesoit amiraus, et leur
bailloit en leur compaingnie deus cens chevaliers ou trois cens; et comme mieus le fesoient, et plus leur donnoit li soudans.
Li pris qui est en leur chevalerie si est tels que, quand il sont si peu et si riche que il n'i ait que dire, et li soudans a peeur que il ne le tuent ou que il ne le desheritent, si les fait pendre et mourir en sa
prison, et à leur femmes tolt ce que elles ont. Et ceste chose fist
li soudans de ceus qui pristrent
le comte de Monfort et
le comte de Bar; et autel fist
Boudendars de ceus qui avoient desconfit
le roy de Hermenie; car pour ce que il
cuidoient avoir bien, il descendirent à pié et l'alèrent saluer là où il chaçoit aus bestes sauvaiges. Et il leur respondi:
«Je ne vous salu pas»; car il li avoient
destourbée sa chace; et leur fist les testes coper.