Livre des saintes paroles et des bons faiz nostre roy saint Looys

   En ces choses areer mist-il jusques à midi; et lors fist sonner les tabours que l'on appelle nacaires, et lors nous coururent sus à pié et à cheval. Tout premier je vous dirai du roy de Sezile (qui lors estoit cuens d'Anjou), pource que c'estoit li premiers par devers Babilone. Il vindrent à li en la manière que l'on jeue aus eschiez; car il li firent courre sus à leur gent à pié, en tel manière que cil à pié li getoient le feu grejois. Et les pressoient tant cil à cheval et cil à pié que il desconfirent le roy de Sezile, qui estoit entre ses chevaliers à pié. Et l'on vint au roy et li dist l'on le meschief où ses frères estoit. Quant il oy ce, il feri des esperons parmi les batailles son frère, l'espée au poing, et se feri entre les Turs si avant que il empristrent la colière de son cheval de feu grejois. Et par celle pointe que li roys fist, il secouri le roy de Sezile et sa gent; et enchacièrent les Turs de leur ost.
   Après la bataille au roy de Sezile, estoit la bataille des barons d'outre mer, dont messires Guis d'Ibelin et messires Baudoins, ses frères, estoient chievetein. Après leur bataille, estoit la bataille monseigneur Gautier de Chasteillon, pleinne de preudomes et de bone chevalerie. Ces deus batailles se deffendirent si vigoureusement que onques li Turc ne les porent ne percier ne rebouter.
   Après la bataille monsigneur Gautier, estoit freres Guillaumes de Sonnac, maistres du Temple, atout ce peu de frères qui li estoient demeuré de la bataille dou mardi. Il ot fait faire deffense endroit li des engins aus Sarrazins que nous avions gaaingniés. Quant li Sarrazin le vindrent assaillir, il getèrent le feu grejois au hordis que il y avoit fait faire; et li feu s'i prist de legier, car li Templier y avoient fait mettre grant quantité de planches de sapin. Et sachiez que li Turc n'atendirent pas que li feus fust touz ars, ains alèrent sus courre aus Templiers parmi le feu ardant. Et à celle bataille, freres Guillaumes, li maistres du Temple, perdi l'un des yeus; et l'autre avoit-il perdu le jour de quaresme-prenant; et en fu mors li diz sires, que Dieus absoille! Et sachiez que il avoit bien un journal de terre darrière les Templiers, qui estoit si chargiez de pilés que li Sarrazin leur avoient lanciés, que il n'y paroit point de terre pour la grant foison de pilés.
   Après la bataille dou Temple, estoit la bataille monsignour Guion Malvoisin, laquel bataille li Turc ne porent onques vaincre; et toutevoies avint ainsi que li Turc couvrirent mon signour Guion Malvoisin de feu grejois, que à grant peinne le porent esteindre sa gent.