Livre des saintes paroles et des bons faiz nostre roy saint Looys

   Ces choses avindrent le premier jour de quaresme. Ce jour meismes, uns vaillans Sarrazins, que nostre ennemi avoient fait chievetain pour Scecedin le fil au seic, que il avoient perdu en la bataille le jour de quaresme-prenant, prist la cote le comte d'Artois qui avoit esté mor celle bataille, et la monstra à tout le peuple des Sarrazins, et leur dist que c'estoit la cote le roy à armer, qui mors estoit. «Et ces choses vous monstre je, pour ce que cors sanz chief ne vaut riens à redouter, ne gent sanz roy. Dont, se il vous plait, nous les assaurons vendredi; et vous y devez acorder, si comme il me semble; car nous ne deverons pas faillir que nous les prenons touz, pour ce que il ont perdu leur chievetein.» Et tuit s'acordèrent que il nous venoient assaillir vendredi.
   Les espies le roy qui estoient en l'ost des Sarrazins vindrent dire au roy ces nouvelles. Et lors commanda li roys à touz les chieveteins des batailles que il feissent leur gent armer dès la mie nuit, et se traisissent hors des paveillons jusques à la lice, qui estoit tele que il y avoit lons merriens, pour ce que li Sarrazin ne se ferissent parmi l'ost; et estoient atachié en terre en tel maniere que l'on povoit passer parmi le merrien à pié. Et ainsi comme li roys l'ot commandé, il fu fait.
   A soleil levant tout droit, li Sarrazins devant nommez, de quoy il avoient fait leur chievetein, nous amena bien quatre mille Turs à cheval, et les fist rangier touz entour nostre ost et li, dès le flum qui vient de Babilone jusques au flum qui se partoit de nostre ost et en aloit vers une ville que l'on appele Risil. Quant il orent ce fait, il nous ramenèrent si grant foison de Sarrazins à pié, que il nous renvironnerent tout nostre ost, aussi comme il avoient des gens à cheval. Après ces deus batailles que je vous cont, firent ranger tout le povoir au soudanc de Babilone, pour eus aidier se mestier leur fust. Quant il orent ce fait,li chieveteins touz seul vint veoir le couvine de nostre ost, sur un petit roncin; et selonc ce que il veoit que nos batailles estoient plus grosses en un lieu que en un autre, il raloit querre de sa gent et renforçoit ses batailles contre les nostres. Après ce, fist-il passer les Beduyns, qui estoient bien trois mille, par devers l'ost que li dus de Bourgoigne gardoit, qui estoit entre les deus rivières. Et ce fist-il pour ce que il cuidoit que li roys eust envoié au duc de sa gent pour li aidier contre les Beduyns, par quoy li os le roy en fust plus febles.