Là où
je demourai ainsi sus mon
roncin,
me demoura li
cuens de
Soissons à destre, et
messires Pierres de Noville à senestre. A tant es vous un Turc qui vint de vers la bataille
le roy, qui darière nous estoit; et
feri par darieres
mon seigneur Pierre de Noville d'une
mace, et le coucha sus le col de son cheval du coup que il li donna, et puis se
feri outre le pont et se lança entre sa gent. Quant li Turc virent que nous ne lairions pas le
poncel, il passèrent le ruissel et se mistrent entre le ruissel et le flum, ainsi comme nous estions venu aval; et nous nous traismes encontre eus en tel maniere que nous estions tuit apareillié à eus sus courre, se il
vousissent passer vers
le roy, et se il
vousissent passer le
poncel. Devant nous, avoit deus serjans
le roy, dont li uns avoit nom
Guillaume de Boon et li autres
Jehans de Gamaches, à cui li Turc qui s'estoient mis entre le flum et le ru, amenèrent tout plein de vileins à pié, qui leur getoient motes de terre:
onques ne les porent mettre sur nous. Au
darrien, il amenèrent un vilain à pié, qui leur geta trois foiz le feu gregeois. L'une des foiz requeilli
Guillaumes de Boon le pot de feu gregeoiz à sa roelle; car se il se fust pris à rien sur li, il eust esté touz ars.
Nous estions tuit couvert de
pilés qui eschapoient des sergens. Or avint ainsi que
je trouvai un
gamboison d'estoupes à un Sarrazin:
je tournai le fendu devers
moy, et fis escu du
gamboison, qui
m'ot grant
mestier; car
je ne fus pas bleciez de leur
pilés que en cinc lieus, et mes
roncins en quinze lieus. Or avint encore ainsi que un miens bourjois de
Joinville
m'aporta une banière à mes armes, à un fer de glaive, et toutes les foiz que nous voions que il pressoient les serjans, nous leur courions sus, et il s'enfuioient.
Li bons
cuens de
Soissons, en ce point là où nous estions, se moquoit à
moy et
me disoit:
«Seneschaus, lessons huer ceste chiennaille; que par la
Quoife Dieu! (ainsi comme il juroit)
encore en parlerons-nous, entre vous et moi, de ceste journée es chambres des dames.»