Livre des saintes paroles et des bons faiz nostre roy saint Looys

   Tandis que nous revenions aval pardessus le flum, entre le ru et le flum, nous veimes que li roys estoit venus sur le flum, et que li Turc en amenoient les autres batailles le roy, ferant et batant de maces et d'espées; et firent flatir toutes les autres batailles avec les batailles le roy sur le flum. Là fu la desconfiture si grans que plusieurs de nos gens recuidèrent passer à nous par devers le duc de Bourgoingne: ce que il ne porent faire; car li cheval estoient lassé et li jours estoit eschaufez, si que nous voions, endementieres que nous venions aval, que li fluns estoit couvers de lances et de escus, et de chevaus et de gens qui se noioient et perissoient. Nous venimes à un poncel qui estoit parmi le ru, et je dis au connestable que nous demourissions pour garder ce poncel: «car se nous le lessons, il ferront sus le roy par deçà; et se nostre gent sont assailli de deus pars, il pourront bien perdre». Et nous le feismes ainsi. Et dist l'on que nous estions trestuit perdu dès celle journée, se li cors le roy ne fust. Car li sires de Courtenay et messires Jehans de Saillenay me contèrent que sis Turc estoient venu au frain le roy et l'emmenoient pris; et il tous seul s'en deslivra, aus grans cous que il leur donna de s'espée. Et quant sa gent virent que li roys mettoit deffense en li, il pristrent cuer, et lessièrent le passaige dou flum plusour d'eus, et se trestrent vers le roy pour li aidier.
   A nous tout droit qui gardions le poncel vint li cuens Pierres de Bretaingne, qui venoit tout droit de vers la Massoure, et estoit navrez d'une espée parmi le visaige, si que li sans li cheoit en la bouche. Sus un bas cheval bien fourni seoit; ses renes avoit getées sus l'arçon de sa belle, et le tenoit à ses dous mains, pour ce que sa gent qui estoient darières, qui mout le pressoient, ne le getassent du pas. Bien sembloit que il les prisast peu; car quant il crachoit le sanc de sa bouche, il disoit mout souvent: «Voi! par le Chief Dieu! avez veu de ces ribaus?» En la fin de sa bataille, venoient li cuens de Soissons et messires Pierres de Noville, que l'on appeloit Caier, qui assez avoient souffert de cous celle journée.
   Quant il furent passé, et li Turc virent que nous gardions le pont, il les lessièrent, et quant il virent que nous avions tournez les visaiges vers eus. Je ving au comte de Soissons, cui cousine germainne j'avoie espousée, et li dis: «Sire, je croi que vous feriés bien se vous demeuriés à ce poncel garder, car si nous lessons le poncel, cist Turc que nous véez ci devant vous, se ferront jà parmi; et ainsi iert li roys assaillis par derière et par devant.» Et il demanda, se il demeuroit, se je demeurroie; et je respondi: «Oïl, mout volentiers.» Quant li connestables oy ce, il me dist que je ne partisse de là tant que il revenist, et il nous iroit querre secours.