Je et mi chevalier
acordames que nous irions sus courre à plusours Turs qui chargeoient lour
harnois à main senestre en leur
ost, et leur courumes sus.
Endementres que nous les chacions parmi l'
ost,
je
resgardai un Sarrazin qui montoit sur son cheval: uns siens chevaliers li tenoit le frain. Là où il tenoit ses deus mains à sa selle pour monter,
je li donnai de mon glaive par dessous les esselles et le getai mort; et quant ses chevaliers vit ce, il laissa son seigneur et son cheval, et
m'apoia, au passer que
je fis, de son glaive entre les deus espaules, et
me coucha sur le col de mon cheval, et
me tint si pressé que
je ne povoie traire m'espée que j'avoie ceinte. Si
me convint traire l'espée qui estoit à mon cheval; et quant il vit que
j'oz m'espée traite, si tira son glaive à li et
me lessa.
Quant
je et mi chevaliers venimes hors de l'
ost aus Sarrazins, nous trouvames bien six mille Turs, par
esme, qui avoient lessiées lour herberges et se estoient trait aus champs. Quant il nous virent, il nous vindrent sus courre, et occistrent
monseigneur Huon de Trichastel, seigneur de Conflans, qui estoit avec
moy à banière.
Je et mi chevalier
ferimes des esperons, et alames
rescourre
monseigneur Raoul de Wanou, qui estoit avec
moy, que il avoient tirié à terre.
Endementieres que
je en revenoie, li Turc
m'apuièrent de lour glaives; mes chevaus s'agenoilla pour le fais que il senti, et
je m'en alai outre parmi les oreilles du cheval. Et
me redresçai, au plus tost que
je peu, mon escu à mon col et m'epée en ma main; et
mes sires Erars de Syverey (que Dieus absoille!), qui estoit entour
moy, vint à
moy et nous dist que nous treissions emprès une maison deffaite, et
illec atenderions
le roy qui venoit. Ainsi comme nous alions à pié et à cheval, une grans
route de Turs vint hurter à nous, et
me portèrent à terre, et alèrent par desus
moy, et firent voler mon escu de mon col. Et quant il furent outre passé,
messires Erars de Syverey revint sur
moy et
m'emmena, et en alames jusques aus murs de la maison deffaite; et
illec revindrent à nous
messires Hugues d'Escoz,
messires Ferris de Loupey,
messires Renaus de Menoncourt.
Illec li Turc nous assailloient de toutes pars; une partie d'eus entrèrent en la maison deffaite, et nous piquoient de lour glaives par desus. Lors
me dirent mi chevalier que
je les preisse par les frains; et
je si fis pour ce que li cheval ne s'enfuissent. Et il se deffendoient des Turs si viguerousement, car il furent loé de touz les preudomes de l'
ost, et de ceus qui virent le fait et de ceus qui l'oïrent dire. Là fu navrez
mes sires Hugues d'Escoz de trois glaives ou visaige, et
mes sires Raoul, et
mes sires Ferris de Loupey d'un glaive parmi les espaules; et fu la plaie si large que li sans li venoit du cors aussi comme li bondons d'un tonnel.
Mes sires Erars de Syverey fu
ferus d'une espée parmi le visaige, si que li nez li cheoit sus le lèvre. Et lors il
me souvint de monseigneur saint Jaque, que
je requis:
«Biaus sire sains Jaques, aidiés-moy et secourez à besoing.»
Maintenant que
j'oi faite ma prière,
mes sires Erars de Syverey
me dist:
«Sire, se vous
cuidiés que je ne mi
hoirs n'eussions reprouvier, je vous iroie
querre secours au
comte d'Anjou, que je voi là en mi les champs.» Et
je li dis:
«Messires Erars, il me semble que vous feriés vostre grant honeur, se vous nous aliés
querre aide pour nos vie sauver, car la vostre est bien en aventure.» Et
je disoie bien
voir; car
il fu mors de celle bleceure.
Il demanda conseil à touz nos chevaliers qui là estoient, et tuit li loèrent ce que
je li avoie loé; et quant
il oy ce,
il
me pria que
je li lessasse aler son cheval, que
je li tenoie par le frain avec les autres; et
je si fiz.
Au
comte d'Anjou vint, et li requist que il
me venist secourre
moy et mes chevaliers. Uns riches hom qui estoit avec li, li desloa; et li
cuens d'
Anjou li dist que il feroit ce que mes chevaliers li requeroit: son frain tourna pour nous venir aidier, et pluseur de ses serjans
ferirent des esperons. Quant li Sarrazin les virent, si nous lessièrent. Devant ces serjans vint
mes sires Pierres de Alberive, l'espée au poing; et quant il vit que li Sarrazin nous orent lessiés, il courut sur tout plain de Sarrazins qui tenoient
mon signour Raoul de Vaunou, et le
rescoy mout blecié.