Un soir avint, là où nous guetions les
chas-chastiaus de nuit, que il nous avièrent un engin que l'on appele
pierrière, ce que il n'avoient encore fait, et mistrent le feu gregeoiz en la fonde de l'engin. Quant
mes sires Gautiers d'Escuiré, li bons chevaliers, qui estoit avec moy, vit ce, il nous dist ainsi:
«Signeur, nous sommes au plus grant peril que nous fussions
onques mais; car se il ardent nos chastiaus et nous demeurons, nous sommes perdu et ars; et se nous lessons nos deffenses que l'on nous a
baillies à garder, nous sommes honni; dont nulz de cest peril ne nous puet deffendre, fors que Dieu. Si vous lo et conseil que toutes les foiz que il nous geteront le feu, que nous nous metons à coutes et à genouz, et prions Nostre Signeur que il nous gart de ce péril.»
Si tost comme il getèrent le premier coup, nous nous meismes à coutes et à genouz, ainsi comme il nous avoit enseignié. Li premiers cous que il jetèrent vint entre nos deus
chas-chastiaus, et chaï en la place devant nous que li
ost avoit faite pour bouchier le fleuve. Nostre esteingneur furent appareillié pour estaindre le feu; et pour ce que li Sarrazin ne povoient traire à eus, pour les deus eles des paveillons que
li roys y avoit fait faire, il traioient tout droit vers les nues, si que li
pilet leur cheoit tout droit vers eus.
La manière du feu gregeois estoit tele que il venoit bien devant aussi gros comme uns tonniaus de verjus, et la queue du feu qui partoit de li, estoit bien aussi grans comme uns grans glaives. Il faisoit tel
noise au venir, que il sembloit que ce fust la foudre du ciel; il sembloit un dragon qui volast par l'air. Tant getoit grant clarté que l'on veoit aussi clair parmi l'
ost comme se il fust jours, pour la grant foison du feu qui getoit la grant clarté.
Trois fois nous getèrent le feu gregois celi soir, et le nous lancièrent quatre foiz à l'arbalestre à tour. Toutes les foiz que
nostre sains rois ooit que il nous getoient le feu grejois, il s'en estoit en son lit, et tendoit ses mains vers Nostre Signeur, et disoit en plourant:
«Biaus Sire Dieu, gardez-moi ma gent!» Et je croi vraiment que ses prières nous orent bien
mestier au besoing. Le soir, toutes les foiz que li feus estoit cheus, il nous envoioit un de ses chamberlans pour savoir en quel point nous estions, et se li feus nous avoit fait point de dommaige.
L'une des fois que il nous getèrent, si chei encoste le
chat-chastel que les gens
monsigneur de Courtenay gardoient, et
feri en la rive du flum. A tant es vous un chevalier qui avoit nom
l'Albigeoiz: «Sire, fist-il à moy,
se vous ne nous aidiéz nous sommes tuit ars; car li Sarrazin ont tant trait de leur
pilés, que il a aussi comme une grant haye qui vient ardant vers nostre
chastel.» Nous saillimes sus et alames là, et trouvames que il disoit
voir. Nous esteingnimes le feu, et avant que nous l'eussions estaint, nous chargièrent li Sarrazin touz de
pilés que il traioient au travers du flum.