Il nous couvient premièrement parler dou flum qui vient par Egypte et de Paradis terrestre; et ces choses vous
ramentoif-je pour vous faire entendant
aucunes choses qui
affièrent à ma matière. Cis fleuves est divers de toutes autres rivières; car quant plus viennent les autres rivières aval, et plus y chiéent de petites rivières et de petiz ruissiaus; et en ce flum n'en chiet nulles:
ainçois avient ainsi que il vient touz en un chanel jusques en Egypte, et lors giete de li sept branches, qui s'espandent parmi Egypte. Et quant ce vient après la saint-Remy, les sept rivières s'espandent par les païs et cuevrent les terres plainnes; et quant elles se retraient, li gaaingneur vont chascuns labourer en sa terre à une charrue sanz rouelles, de quoy il tornent dedans la terre les fourmens, les orges, les
comminz, le ris; et viennent si bien que nulz n'i sauroit qu'amender. Ne ne sait l'on dont celle creue vient, mais que la volenté Dieu; et se ce n'estoit, nul bien ne viendroit au païs, pour la grant chaleur du soleil qui arderoit tout, pour ce que il ne pluet nulle foiz au pays. Li fluns est touz-jours troubles; dont cil du païs qui boire en vuelent, vers le soir le prennent, et esquachent quatre amendes ou quatre feves; et l'endemain est si bone à boire que riens n'i faut.
Avant que li fluns n'entre en Egypte, les gens qui ont acoustumé à ce faire, gietent leur roys desliées parmi le flum au soir; et quant ce vient au matin, si treuvent en lour royz cel avoir de poiz que l'on aporte en ceste terre, c'est à savoir gingembre, rubarbe,
lignaloey et canele. Et l'on dit que ces choses viennent de Paradis terrestre; que li venz abat des arbres qui sont en Paradis, aussi comme li venz abat en la forest en cest païs le bois sec; et ce qui chiet du bois sec au flum, nous vendent li marcheant en ce païz. L'yaue dou flum est de tel nature, que quant nous la pendions (en poz de terre blans que l'on fait au païs) aus cordes de nos paveillons, l'yaue devenoit au chaut du jour aussi froide comme de fonteinne.
Il disoient au païs que
li soudans de Babilone avoit maintes fois essaié dont li fluns venoit; et y envoioit gens qui portoient une manière de pains que l'on appelle becuis, pour ce que il sont cuit par deus foiz; et de ce pain vivoient tant que il revenoient arières au
soudanc. Et raportoient que il avoient cerchié le flum, et que il estoient venu à un grant tertre de roches tailliées, là où nulz n'avoit povoir de monter. De ce tertre cheoit li fluns; et leur sembloit que il yeust grant foison d'arbres en la montaigne en haut; et disoient que il avoient trouvé merveilles de diverses bestes sauvaiges et de diverses façons, lyons, serpens, oliphans, qui les venoient regarder desus la rivière de l'yaue, aussi comme il aloient en amont.
Or revenons à nostre premiere matiere, et disons ainsi que quant li fluns vient en Egypte, il giete sept branches aussi comme je ai jà dit devant. L'une de ses branches va en
Damiete, l'autre en
Alixandre, la tierce à
Tenis, la quarte à
Rexi. Et à celle branche qui va à
Rexi, vint
li roys de France atout son
ost, et si se logea entre le flum de
Damiete et celui de
Rexi; et toute la puissance dou
soudanc se logièrent sur le flum de
Rexi, d'autre part, devant nostre
ost pour nous deffendre le passaige: laquele chose leur estoit legière à faire; car nulz ne povoit passer ladite yaue par devers eus, se nous ne la passions à nou.