Or revenons à nostre matière et disons ainsi que, un peu après ce que nous eussions pris
Damiete, vindrent devant l'
ost toute la chevalerie au
soudanc, et
assistrent nostre
ost par devers la terre.
Li roys et toute la chevalerie s'armèrent.
Je, touz armez, alai parler au
roy, et le trouvai tout armé séant sus une forme, et des preudomes chevaliers qui estoient de sa bataille, avec li touz armés. Je li requis qu'il
vousist que je et ma gent alissions jusques hors de l'
ost, pour ce que li Sarrazin ne se
ferissent en nos heberges. Quant
mes sires Jehans de Biaumont oy ma requeste, il m'escria mout fort, et me commanda, de par
le roy, que je ne me partisse de ma heberge jusques à temps que
li roys le me commanderoit.
Les preudommes chevaliers qui estoient avec
le roy vous ai-je
ramenteu, pour ce que il en y avoit avec li huit, tous bons chevaliers, qui avoient eu pris d'armes de ça mer et de là; et tels chevaliers soloit l'on appeler bons chevaliers. Li nom de ceus qui estoient chevalier entour
le roy sont tel:
mes sires Geoffroys de Sargines,
mes sires Mahieus de Marly,
mes sires Phelippes de Nanteuil,
mes sires Ymbers de Beaujeu, connestables de France, qui n'estoit pas là,
ainçois estoit au dehors de l'
ost, entre li et le maistre des arbalestriers, atout le plus des serjans à armes
le roy, à garder nostre
ost, que li Turc n'i feissent doumage.
Or avint que
mes sires Gauchiers d'Autreche se fist armer en son paveillon de touz poins, et quant il fu montez sur son cheval, l'ecu au col, le heaume en la teste, il fist lever les pans de son paveillon, et
feri des esperons pour aler aus Turs; et au partir que il fist de son paveillon touz seuls, toute sa mesnie escria à haute voiz:
«Chasteillon!» Or avint ainsi que avant que il venist aus Turs, il chaï, et ses chevaus li vola parmi le cors; et s'en ala li chevaus, couvers de ses armes, à nos ennemis, pour ce que le plus des Sarrazins estoient monté sur jumens; et pour ce trait li chevaus aus Sarrazins.
Et nous contèrent cil qui le virent que quatre Turc vinrrent par
le signeur Gauchier, qui se gisoit par terre; et au passer que il fesoient par devant li, li donnoient grans cous de leur
maces là où il gisoit. Là le
rescourrent
li connestables de France et pluseur des sergens
le roy avec li, qui le ramenèrent par les bras jusques à son paveillon. Quant il vint là, il ne pot parler; pluseur des cyrurgiens et des
phisiciens de l'
ost alèrent à li; et pour ce que il leur sembloit que il n'i avoit point de peril de mort, il le firent seignier des deus bras.
Le soir, tout tart, me dist
mes sires Aubers de Narcy que nous l'alissions veoir, pour ce que nous ne l'avions encore veu, et estoit hom de grant nom et de grant valeur. Nous entrames en son paveillon, et des chamberlans nous vint à l'encontre pour ce que nous alissions belement, et pour ce que nous ne esveillissions son maistre. Nous le trouvames gisant sus couvertours de menu vair, et nous traimes tout souef vers li, et le trouvames mort. Quant on le dist au
roy, il respondi que il n'en vourroit mie avoir tels mil, puis que il ne
vousissent
ouvrer de son commandement, aussi comme il avoit fait.