Autant puet dire Nostre Sires de nous comme il dist des fiz Israel, là où il dist:
Et pro nichilo habuerunt terram desiderabilem. Et que dist-il après? Il dist que il oublièrent Dieu, qui sauvez les avoit. Et comment nous l'oubliames vous dirai-je ci après.
Je vous prendrai premièrement au
roy, qui manda
querre ses barons, les clers et les laiz, et lour requist que il li aidassent à conseillier comment l'on departiroit ce que l'on avoit gaaingné en la ville. Li patriarches fu li premiers qui parla, et dist ainsi:
«Sire, il me semble que il iert bon que vous retenez les formens et les orges et les ris, et tout ce de quoy on puet vivre, pour
la ville garnir; et face l'on crier en l'ost que tuit li autre mueble fussent aporté en l'ostel au
legat, sur peine de escommeniement.» A ce conseil s'
acordèrent tuit li autre baron. Or avint ainsi que tuit li mueble, que l'on apporta à l'ostel
le legat ne montèrent que à sis mille livres.
Quant ce fu fait,
li roys et li baron mandèrent
querre
mon signour Jehan de Waleri le preudome, et li distrent ainsi:
«Sire de Waleri, dist
li roys, nous avons
acordé que
li legas vous
baillera les sis mille livres, à departir là où vous
cuiderés que il soit mieus. —
Sire, fist
li preudom, vous me faites grant honeur, la vostre
merci! mais ceste honeur et ceste offre que vous me faites, ne prendrai-je pas, se Dieu plait; car je desferoie les bonnes coustumes de la Sainte-Terre, qui sont teles: car quant l'on prent les cités des ennemis, des biens que l'on treuve dedans, li roys en doit avoir le tiers, et les pelerins en doivent avoir les deus pars. Et ceste coustume tint bien
li roys Jehans quant il prist
Damiete; et ainsi come li ancien dient, li roy de
Jerusalem qui furent devant
le roy Jehan, tindrent bien ceste coustume. Et se il vous plait que vous me vueilliez
baillier les deus pars des fourmens et des orges, des ris et des autres vivres, je me entremetterai volentiers pour departir aus pèlerins.»
Li roys n'ot pas conseil dou faire, et ainsi demoura la
besoigne; dont mainte gent se tindrent mal apaié de ce que
li roys deffit les bonnes coustumes anciennes.
Les gens
le roy, qui deussent debonnairement les gens retenir, lour loerent les estaus pour vendre lour danrées aussi chier, si comme l'on disoit, comme il porent; et pour ce la renommée couru en estranges terres: dont maint marcheant lessiérent à venir en l'
ost. Li baron, qui deussent garder le leur pour bien emploier en lieu et en temps, se pristrent à donner les grans mangiers et les outrageuses
viandes. Li communs peuples se prist aus foles femmes; dont il avint que
li roys donna congié à tout plein de ses gens, quant nous revenimes de
prison. Et je li demandai pour quoi il avoit ce fait; et il me dist que il avoit trouvé de certein que, au giet d'une pierre menue, entour son paveillon, tenoient cil leur bordiaus à cui il avoit donné congié, et au temps du plus grant
meschief que li
os eust
onques esté.