Quant
li roys oy dire que l'enseigne Saint-Denis estoit à terre, il en ala grant pas par mi son vessel, ne
onques pour
le legat qui estoit avec li, ne la vout lessier, et sailli en la mer, dont il fu en yaue jusques aus esseles. Et ala l'escu au col, et le heaume en la teste, et le glaive en la main, jusques à sa gent qui estoient sur la rive de la mer. Quant il vint à terre et il choisi les Sarrazins, il demanda quele gent c'estoient; et on li dist que c'estoient Sarrazin; et il mist le glaive desous s'esselle et l'escu devant li, et eust couru sus aus Sarrazins, se sui preudome, qui estoient avec li, eussent souffert.
Li Sarrazins envoièrent au
soudanc par coulons messagiers par trois foiz, que
li roys estoit arivez, que
onques
messaige n'en orent, pour ce que
li soudans estoit en sa maladie; et quant il virent ce, il
cuidièrent que
li soudans fu mors, et lessièrent
Damiete.
Li roys y envoia savoir par un messagier chevalier. Li chevaliers s'en vint au
roy, et dist que il avoit esté dedans les maisons au
soudanc, et que c'estoit
voirs. Lors envoia
querre
li roys
le legat et touz les prélas de l'ost, et chanta l'on hautement:
Te Deum laudamus. Lors monta
li roys et nous tuit, et nous alames logier devant
Damiete.
Mal apertement se partirent li Turc de
Damiete, quant il ne firent coper le pont qui estoit de nefs, qui grant
destourbier nous eust fait; et grant doumaige nous firent au partir, de ce que il
boutèrent le feu en la
fonde, là où toutes les marcheandises estoient et touz li avoirs de poiz. Aussi avint de ceste chose comme qui averoit demain
bouté le feu (dont Dieu le gart!) à Petit Pont de
Paris.
Or disons donc que grant grace nous fist Dieu li touz puissans, quant il nous deffendi de mort et de peril à l'ariver, là où nous arivames à pié, et courumes sus à nos ennemis, qui estoient à cheval. Grant grace nous fist Nostre Sires, de
Damiete que il nous delivra, laquel nous ne deussions pas avoir prise sanz affamer; et ce povons-nous veoir tout cler, pour ce que par affamer la prist
li roys Jehans au temps de nos pères.