Mes sires Baudoins de Reims, uns preudom qui estoit descendus à terre, me manda par son escuier que je l'atendisse; et je li mandai que si feroie je mout volentiers, que tel preudom comme il estoit devoit bien estre atendus à un tel besoing; dont il me sot bon gré toute sa vie. Avec li nous vindrent mi chevalier; et soiés certain que quant je arivai, je n'oz ni escuier, ne chevalier, ne
varlet que je eusse amené avec moy de mon pays; et si ne m'en lessa pas Dieu à aidier. A nostre main senestre, ariva li
cuens de
Japhe, qui estoit cousins germains
le conte de Monbeliart, et dou lignaige de
Joinville. Ce fu cil qui plus noblement ariva; car sa
galie ariva toute peinte, dedens mer et dehors, à escussiaus de ses armes, lesquels armes sont d'or à une croiz de gueules
patée. Il avoit bien trois cens nageeurs en sa
galie, et à chascun de ses nageeurs avoit une targe de ses armes, et à chascune targe avoit un pennoncel de ses armes batu à or.
Endementieres que il venoient, il sembloit que la
galie volast, par les nageeurs qui la contreingnoient aus avirons; et sembloit que foudre cheïst des cieus, au bruit que li pennoncel menoient, et que li
nacaire, li tabour et li cor sarrazinnois menoient, qui estoient en sa
galie. Si tost comme la
galie fu
ferue ou sablon si avant comme l'on l'i pot mener, et il et sui chevalier saillirent de la
galie moult bien armé et moult bien
atirié, et se vindrent arangier decoste nous.
Je vous avoie oublié à dire que, quant li
cuens de
Japhe fu descendus, il fist tantost tendre ses
trez et ses paveillons; et si tost comme li Sarrazin les virent tendus, ils se vindrent tuit assembler devant nous, et revindrent
ferant des esperons, ainsi comme pour nous courre sus; et quant il virent que nous ne fuirions pas, il s'en ralèrent tantost arières.
A nostre main destre, bien le trait à une grant arbalestrée, ariva la
galie là où l'enseigne Saint-Denis estoit. Et ot un Sarrazin, quant il furent arivé, qui se vint
ferir entre eus, ou pour ce que il ne pot son cheval tenir ou pour ce que il
cuidoit que li autre deussent suivre; mais il fu touz decopez.