Maintenant que mars entra, par le commandement
le roy,
li roys et li baron et li autre pelerin commanderent que les nefs refussent chargiées de vins et de
viandes, pour mouvoir quant
li roys le commanderoit. Dont il avint ainsi que quant
li rois vit que la chose fu bien
arée,
li roys et
la royne se requeillirent en lour nefs le vendredi devant Penthecouste; et dist
li roys à ses barons que il alassent après li en leur nefs droit vers Egypte. Le samedi fist
li roys voile, et tuit li autre vessel aussi, qui mout fu belle chose à veoir; car il sembloit que toute la mers, tant comme l'on povoit veoir à l'ueil, fust couverte de
touailles, des voiles des vessiaus, qui furent nombré à dix-huit cens vessiaus, que granz que petiz.
Li roys ancra au bout d'un tertre que l'on appele
la pointe de Limeson, et tuit li autre vessel entour li.
Li roys descendi à terre, le jour de la Penthecouste. Quant nous eumes oy la messe, uns venz griez et forz, qui venoit de vers Egypte, leva en tel manière que de deus mille et huit cens chevaliers que
li roys mena en Egypte, ne l'en demoura que sept cens que li venz ne les eust
dessevrés de la compagnie
le roy, et menez en
Acre et en autres terres estranges, qui puis ne revindrent au
roy de grant pièce.
L'endemain de la Penthecouste, li venz fu cheus;
li roys et nous qui estions avec li demouré, si comme Dieu vout, feismes voile derechief, et encontrames
le prince de la Morée et
le duc de Bourgoingne, qui avoit sejourné en la Morée. Le jeudi après la Penthecouste, ariva
li roys devant
Damiete, et trouvames là tout la povoir dou
soudanc sur la rive de la mer, mout beles gens à regarder; car
li soudans porte les armes d'or, là où li solaus
feroit, qui fesoit ses armes resplendir. La
noise que il menoient de leur
nacaires et de leur cors sarrazinnois, estoit espoventable à escouter.
Li roys manda ses barons pour avoir conseil que il feroit. Mout de gens li loèrent que il atendist tant que ses gens fussent revenu, pour ce que il ne li estoit pas demouré la tierce partie de ses gens; et il ne les en vout
onques croire. La raisons pourquoy, que il dist que il en donroit
cuer à ses ennemis; et meismement que en la mer devant
Damiete n'a point de port là où il peust sa gent atendre, pour ce que uns for venz nes preist et menast en autres terres, aussi comme li autre avoiient esté mené le jour de la Penthecouste.