En ce point que nous venimes en Cypre,
li soudans dou Coyne estoit li plus riches de toute la païennime. Et avoit faite une merveille; car il avoit fait fondre grant partie de son or en poz de terre là où l'on met vin outre mer, qui tiennent bien trois muis ou quatre de vin; et fist brisier les poz; et les masses d'or estoient demourées en mi un sien chastel, que chascuns qui entroit ou chastel y povoit touchier et veoir; et en y avoit bien six ou sept.
Sa grans richesce apparut en un paveillon que
li roys d'Ermenie envoia au
roy de France, qui valoit bien cinq cens livres; et li manda
li roys d'Ermenie que uns ferrais au
soudanc dou Coyne li avoit donné. Ferrais est cil qui tient les paveillons au soudanc et qui li nettoie ses maisons.
Li roys d'Ermine, pour li delivrer dou servaige au
soudanc dou Coyne, s'en ala au
roy des Tartarins, et se mist en lour servaige pour avoir lour aide; et amena si grant foison de gens d'armes que il ot povoir de combattre au
soudanc dou Coyne. Et dura grant pièce la bataille, et li tuèrent li Tartarin tant de sa gent que l'on n'oy puis des nouvelles de li. Pour la renommée, qui estoit grans en Cypre, de la bataille qui devoit estre, passèrent de nos gens serjans en Herménie pour gaaingnier et pour estre en la bataille; ne
onques nulz d'eus n'en revint.
Li soudans de Babilone, qui atendoit
le roy qu'il venist en Egypte au nouvel temps, s'apensa que il iroit confondre
le soudanc de Hamant, qui estoit ses ennemis mortels, et l'ala asségier dedans
la cité de Hamant.
Li soudans de Hamant ne se sot comment chevir dou
soudanc de Babilone; car il veoit bien que se il vivoit longuement, que il le confonderoit. Et fist tant
barguigner au
ferrais
le soudanc de Babilone, que
li ferrais l'empoisonna.
Et la manière de l'empoisonnement fu tele, que
li ferrais s'avisa que
li soudans venoit touz jours jouer aus eschez, après
relevée, sur les nattes qui estoient au pié de son lit; laquel natte sur quoy il sot que
li soudans s'asséoit touz les jours, il l'envenima. Or avint ainsi que
li soudans, qui estoit
deschaus, se tourna sus une escorcheure que il avoit en la jambe. Tout
maintenant li venins se
feri au vif, et li tolli tout le pouvoir de la moitié dou cors de celle part dont il estoit entrez; et toutes les foys que li venins le poignoit vers le cuer, il estoit bien deus jours qu'il ne bevoit, ne ne manjoit, ne ne parloit.
Le soudanc de Hamant lessièrent en paix et le menèrent sa gent en Egypte.