Au mois d'aoust entrames en nos nefs à la Roche de
Marseille. A celle journée fist l'on ouvrir la porte de la nef, et mist l'on touz nos chevaus
ens que nous devions mener outre mer; et puis reclost l'on la porte et l'enboucha l'on bien, aussi comme quant l'on naye un tonnel, pour ce que, quant la nefs est en la grant mer, toute la porte est en l'yaue. Quant li cheval furent
ens, nostre maistres
notonniers escria à ses
notonniers, et leur dist:
«Est
arée vostre
besoigne?» Et il respondirent:
«Oil, sire; vieingnent avant li clerc et li provere.»
Maintenant que il furent venu, il leur escria:
«Chantez, de par Dieu!» Et tuit s'escrièrent à une voix:
«Veni Creator Spiritus.» Et il escria à ses
notonniers: «Faites voile, de par Dieu!» Et si il firent. Et en brief tens li venz se
feri ou voile, et nous ot tolu la veue de la terre, que nous ne veismes que ciel et yaue; et chascun jour nous esloigna li venz des païs où nous avions esté né. Et ces chose vous monstrè je que cil est bien fol hardis, qui se ose mettre en tel péril atout autrui
chatel ou en pechié mortel; car l'on se dort le soir là où on ne sait se l'on se trouvera ou font de la mer le matin.
En la mer nous avint une fière merveille: que nous trouvames une montaigne toute ronde, qui estoit devant Barbarie. Nous la trouvames entour l'eure de vespres, et najames tout le soir, et
cuidames bien avoir fait plus de cinquante lieues; et l'endemain nous nous trouvames devant icelle meisme montaigne; et ainsi nous avint par deus foiz ou par trois. Quant li marinier virent ce, il furent tuit esbahi, et nous distrent que nos nefs estoient en grant peril; car nous estions devant la terre aus Sarrazins de Barbarie. Lors nous dist un preudom prestres, que on apeloit
doyen de Malrut, que nous feissions trois processions par trois samedis; car il n'ot
onques persecucion en paroisse, ne par defaut d'yaue, ne de trop pluie, ne d'autre persecucion, que aussi tost comme il avoit fait trois processions par trois samedis, que Dieus et sa Mère ne le delivrassent. Samedis estoit; nous feimes la première procession entour les deus maz de la nef: je meismes m'i fiz porter par les braz, pour ce que je estoie grief malades.
Onques puis nous ne veismes la montaigne, et venimes en Cypre le tiers samedi.