Après ces choses, je reving en nostre païs, et
atirames, li
cuens de
Salebruche et je, que nous envoierions nostre
harnois à charrettes à
Ausonne, pour mettre
illec en la riviere de Saonne, pour aler jusques à
Arles depuys la Saonne jusques au Rone.
Le jour que je me parti de
Joinville, j'envoiai
querre
l'abbé de Cheminon, que on tesmoingnoit au plus preudome de l'ordre blanche. Un tesmoingnaige li oy porter à
Clerevaus, le jour d'une feste Nostre-Dame, que
li sainz roys i estoit, à un moinne qui le monstra, et me demanda se je le cognoissoie. Et je li diz pourquoy il le me demandoit. Et il me respondi:
«Car je entent que c'est le plus preudom qui soit en toute l'ordre blanche. Encore sachiez, fist il,
que j'ai oy conter à un preudome qui gisoit au dortoir là où
li abbés de Cheminon dormoit; et avoit
li abbés descouvert sa poitrine pour la grant chalour que il avoit; et vit cis preudom, qui gisoit au dortoir où
li abbés de Cheminon dormoit, la Mère Dieu qui ala au lit
l'abbé, et li retira sa robe sur son
piz pour ce que li vens ne li feist mal.»
Cis abbés de Cheminon si me donna m'escharpe et mon bourdon; et lors je me parti de
Joinville, sans rentrer au chastel jusques à ma revenue, à pié,
deschaus et en
langes; et ainsi alai à
Blehecourt et à
Saint-Urbain, et autres cors sains qui là sont. Et
endementieres que je aloie à
Blehecourt et à
Saint-Urbain, je ne voz
onques retourner mes yeus vers
Joinville, pour ce que li cuers ne me attendrisist du biau chastel que je lessoie et de mes deus enfans. Je et mi compaingnon mangeames à
la Fonteine l'Arcevesque devant
Dongieuz; et
illecques,
l'abbés Adans de Saint-Urbain (que Dieus absoille!) donna grant foison de biaus joiaus à moy et à neuf chevaliers que j'avoie. Dès là nous alames à
Ausone, et en alames atout nostre
hernoiz, que nous avions fait mettre es nefs, dès
Ausone jusques à
Lyon contreval la Sone; et encoste les nefs menoit on les grans
destriers. A
Lyon, entrames ou Rone pour aler à
Arles le Blanc; et dedans le Rone trouvames un chastel que l'on appell
Roche de Glin, que
li roys avoit fait abatre pour ce que
Rogiers, li sires du chastel, estoit criez de desrober les pèlerins et les marchans.