Li roys manda tous ses barons à
Paris, et leur fist faire
sairement que foy et loiauté porteroient à ses enfans, se
aucune chose avenoit de li en la voie. Il le me demanda; mais je ne voz faire point de
sairement, car je n'estoie pas ses hom.
Endementres que je venoie, je trouvai trois homes mors sur une charrette, que uns clers avoit tuez; et me dist on que on les menoit au
roy. Quant je oy ce, je envoiai un mien escuier après, pour savoir comment ce avoit esté. Et conta mes escuiers, que je y envoiai, que
li roys, quant il
issi de sa chapelle, ala au perron pour veoir les mors, et demanda au prévost de
Paris comment ce avoit esté. Et li prévoz li conta que li mort estoient troi de ses serjans dou
Chastelet, et li conta que il aloient par les rues forainnes pour desrober la gent. Et dist au
roy que
«il trouvèrent ce clerc que vous veez ci, et lui tollirent toute sa robe. Li clers s'en ala en pure sa chemise en son hostel, et prist s'arbalestre, et fist aporter à un enfant son fauchon. Quant il les vit, il les escria et leur dist que il y mourroient. Li clers tendi s'arbalestre et trait, et en
feri l'un parmi le cuer; et li dui touchièrent à fuie; et li clers prist le fauchon que li enfes tenoit, et les ensui à la lune, qui estoit belle et clère. Li uns en
cuida passer parmi une soif en un courtil, et li clers
fiert dou fauchon, fist li prévoz,
et li trancha toute la jambe, en tel manière que elle ne tient que à l'estival, si comme vous veez. Li clers rensui l'autre, liquels
cuida descendre en une estrange maison, là où la gent veilloient encore; et li clerc le
feri dou fauchon parmi la teste, si que il le fendi jusques ès dens, si comme vous povez veoir, fist li prévoz au
roy. Sire, fist-il,
li clers montra son fait aus voisins de la rue, et puis si s'en vint mettre en vostre
prison,
Sire, et je le vous amein; si en ferez vostre volenté; et veez le ci.
— Sire clers, fist
li roys, vous avez perdu à estre prestre par vostre proesce; et pour vostre proesce je vous retieng à mes gaiges, et en viendrez avec moi outre mer. Et ceste chose vous faiz je encore à savoir, pour ce que je vueil bien que ma gent voient que je ne les soustendrai en nulles de leur mauvaistiés.» Quant li peuples qui là estoit assemblez oy ce, il se escrièrent à Nostre Seigneur, et li prièrent que Dieus li donnast bone vie et longue, et le ramenast à joie et à santé.