Après ces choses desus dites avint, ainsi comme Dieu vout, que une grans maladie prist
le roy à
Paris, dont il fu à tel
meschief, si comme on le disoit, que l'une des dames qui le gardoit li vouloit traire le drap sur le visaige, et disoit qu'il estoit mors. Et une autre dame, qui estoit à l'autre part dou lit, ne li souffri mie;
ainçois disoit qu'il avoit encore l'ame au cors.
Et comme il oyt le descort de ces deus dames, Nostre Sires
ouvra en li et li envoia santé tantost; car il estoit esmuyz et ne povoit parler. Et si tost qu'il fu en estat pour parler, il requist que on li donnast la croiz, et si fist on. Lors
la royne sa mère oy dire que la parole li estoit revenue, et elle en fist si grant joie comme elle pot plus. Et quant elle sot que il fu
croisiéz, ainsi comme il meismes le contoit, elle mena aussi grant deuil comme se elle le veist mort.
Après ce que il fu
croisiéz, se
croisièrent Robers li
cuens d'
Artois, Alphons
cuens de
Poitiers, Charles
cuens d'
Anjou, qui puis fu roys de Cezile, tuit troi frères
le roy; et se
croisa
Hugues duc de Bourgoingne, Guillaumes
cuens de
Flandres, frères
le comte Guion de Flandres, nouvellement mort, li bons Hues
cuens de
Saint-Pol,
mes sires Gauchiers ses
niez, qui mout bien se maintint outre mer, et mout eust valu se il eust vescu.
Si i furent li
cuens de
la Marche et
Hugues li Bruns ses fiz, li
cuens de
Salebruche,
messires Gobers d'Apremont ses frères, en cui compaingnie,
je Jehans, sires de Joinville, passames la mer en une nef que nous louames, pour ce que nous estions cousin; et passames de là atout vint chevaliers, dont il estoit li disiesme et je moy disiesme.