Li
cuens de
la Marche, comme cil qui ne le pot amender, s'en vint en la
prison
le roy, et li amena en sa
prison
sa femme et ses enfans: dont
li roys ot, par la paix fesant, grant coup de la terre
le comte; mais je ne sai pas combien, car je ne fu pas à celi fait, car je n'avoie
onques lors hauberc vestu. Mais j'oy dire que, avec la terre que
li roys emporta, li quita li
cuens de
la Marche dix mille livres de parisis que il avoit en ses cofres, et chascun an autant.
Quant nous fumes à
Poitiers, je vi un chevalier qui avoit non
monseigneur Geffroy de Rancon, qui pour un grant outraige que li
cuens de
la Marche li avoit fait, si comme l'on disoit, avoit juré sur sains que il ne seroit jamais
roingniez en guise de chevalier, mais porteroit grève, aussi comme les femmes fesoient, jusques à tant que il se verroit vengiez dou
comte de la Marche, ou par lui ou par autrui. Et quant
messires Geffroys vit
le comte de la Marche,
sa femme et ses enfans, agenoilliez devant
le roy, qui li crioient
merci, il fist aporter un tretel, et fist oster sa grève, et se fist
roingnier tout à coup en la presence dou
roy, dou
comte de la Marche et de ceus qui là estoient.
Et en cel
ost contre
le roy d'Angleterre et contre les barons,
li roys donna de grans dons, si comme je l'oy dire à ceus qui en vindrent. Ne pour dons, ne pour despens que l'on feist en cel
ost,
li roys ne requist ne ne prist
onques aide des siens barons, n'à ses chevaliers, n'à ses homes, ne à ses bones villes, dont on se plainsist. Et ce n'estoit pas de merveille; car ce fesoit il par le consoil de
la bone mère qui estoit avec li, de cui conseil il
ouvroit, et des preudhommes qui li estoient demourés dou tems
son père et dou tems
son ayeul.